فرانتسيادا اپتاپ ىستىق پەن وزەندەردەگى سۋ دەڭگەيىنىڭ تومەندەۋىنە بايلانىستى ءۇش يادرولىق رەاكتوردىڭ جۇمىسى ۋاقىتشا توقتاتىلدى، دەپ حابارلايدى "ادىرنا" ۇلتتىق پورتالى.
بۇل تۋرالى جەرگىلىكتى باق حابارلادى. مالىمەتكە سايكەس، Chooz اتوم ەلەكتر ستانتسياسىنداعى ەكى رەاكتور مەن اردەنن وڭىرىندەگى تاعى ءبىر رەاكتور ەكولوگيالىق تالاپتارعا بايلانىستى ۋاقىتشا توقتاتىلعان. شەشىم مااس جانە موزەل وزەندەرىندەگى سۋ دەڭگەيىنىڭ تومەندەۋىنە بايلانىستى قابىلدانعان. اتالعان وزەندەردىڭ سۋى اتوم ەلەكتر ستانتسيالارىنىڭ رەاكتورلارىن سالقىنداتۋعا پايدالانىلادى.
بۇعان دەيىن EDF كومپانياسى اۋا تەمپەراتۋراسىنىڭ جوعارىلاۋىنا بايلانىستى Bugey 3, Tricastin 4 جانە Saint-Alban اتوم ەلەكتر ستانتسيالارىنداعى ەلەكتر ەنەرگياسىن ءوندىرۋ كولەمىن دە قىسقارتقان بولاتىن. فرانتسيادا وندىرىلەتىن ەلەكتر ەنەرگياسىنىڭ شامامەن 70 پايىزى اتوم ەلەكتر ستانتسيالارىنا تيەسىلى. رەاكتورلاردى سالقىنداتۋ ءۇشىن وزەندەر مەن تەڭىز سۋلارى پايدالانىلاتىندىقتان، ۇزاققا سوزىلعان اپتاپ ىستىق پەن قۇرعاقشىلىق ەنەرگەتيكالىق نىسانداردىڭ جۇمىسىنا تىكەلەي اسەر ەتەدى.
فرانتسيا مامىر ايىنان بەرى كەزەكتى اپتاپ ىستىق كەزەڭىن باستان وتكەرىپ جاتىر. ەل بيلىگىنىڭ مالىمەتىنشە، بيىلعى ماۋسىم ايى مەتەوباقىلاۋ تاريحىنداعى ەڭ ىستىق اي رەتىندە تىركەلسە، شىلدە ايىنداعى ىستىق تولقىنى ەڭ ۇزاققا سوزىلعان كەزەڭدەردىڭ ءبىرى بولدى.
