Qūryltai sailauyna deiın kün jaqyndaǧan saiyn sailaualdy nauqan da ūrannan görı naqty ūsynystarǧa köbırek süiene bastady. Keşe partiialar pıkırtalasty teleefirden qoǧamnyŋ naqty sūranysy qalyptasatyn oryndarǧa – öndırıs oryndaryna, äleumettık mekemelerge jäne öŋırlık jūmyspen qamtu ortalyqtaryna alyp şyqty. Al baǧdarlamalar mazmūndy ärı naqtylana tüsken saiyn, partiialar arasyndaǧy pıkırtalas ta jalpy ūrandardan görı qarsylastary ūsynǧan naqty bastamalar men şeşımder töŋıregınde örbi bastady.
Mınber ornyna zauyttar: partiialar önerkäsıp öŋırlerınıŋ qoldauyna ie boluǧa ūmtyluda
Qaraǧandy oblysynda Aibek Dadabai bastaǧan «Ädılet» partiiasynyŋ delegasiiasy «Qarmet» AQ eŋbek ūjymymen kezdestı. Kezdesu barysynda öndırıs oryndaryn jaŋǧyrtu, eŋbek qauıpsızdıgıne baqylaudy küşeitu jäne industriialyq qalalar üşın bılıktı kadrlar daiarlau mäselelerı talqylandy.
Osyǧan ūqsas baǧytty Qazaqstan Halyq partiiasy da ūstandy. Alaida partiia öndırıs ornyna emes, sifrlyq damu mäselesıne basymdyq berdı. Batys Qazaqstan oblysynda partiia ökılderı «Azamattarǧa arnalǧan ükımet» memlekettık korporasiiasy filialynyŋ ūjymymen kezdesıp, elektrondyq servisterdı damytu jäne sifrlyq baqylau tetıkterın jetıldıru mäselelerın talqylady.
Äleumettık kün tärtıbı: qarttar üiınen poşta bölımşesıne deiın
JSDP sailaualdy nauqanyn halyqtyŋ äleumettık tūrǧydan osal toptaryn qoldau mäselelerı töŋıregınde jalǧastyruda. Partiia atynan kandidat Nūriia Baltabaiqyzy Jezqazǧan qalasyndaǧy «Ūlytau Meiırımı» mümkındıgı şekteulı jandarǧa arnalǧan qoldau ortalyǧynda jäne qarttar üiınde boldy.
Öz kezegınde «Auyl» partiiasy şalǧai eldı mekenderdıŋ infraqūrylymyn damytuǧa basymdyq berdı. Qostanaida partiia töraǧasy Qairat Aituǧanov deputattyqqa kandidattarmen bırge «Qazpoşta» AQ filialynyŋ ūjymyna partiianyŋ sailaualdy baǧdarlamasyn tanystyrdy. Kezdesude auyldyq aumaqtardy qoldau, jaŋa jūmys oryndaryn qūru jäne jergılıktı özın-özı basqarudy damytu mäselelerı söz boldy.
«Baitaq» partiiasy da özınıŋ ekologiialyq baǧytyn jalǧastyruda. Partiia kandidaty Vladimir Martel Talǧardaǧy Almaty memlekettık tabiǧi qoryǧynyŋ qyzmetkerlerımen kezdesıp, bioaluantürlılıktı saqtau jäne erekşe qorǧalatyn tabiǧi aumaqtardy qorǧau mäselelerın talqylady.
Baǧdarlamalar tartysy: pıkırtalas naqty bastamalar töŋıregıne oiysty
Keşe ekologiia men ekonomika toǧysqan tūsta partiialar arasyndaǧy alǧaşqy eleulı pıkır qaişylyǧy baiqaldy. Qazaqstan Halyq partiiasy JSDP-nyŋ ekologiialyq talaptardy būzǧan käsıporyndardyŋ qyzmetın uaqytşa toqtatu turaly bastamasyn synǧa aldy. Partiianyŋ pıkırınşe, mūndai qadam jalaqynyŋ keşıguıne jäne jūmys oryndarynyŋ qysqaruyna äkeluı mümkın. Onyŋ ornyna QHP käsıporyndardy memlekettık qoldau arqyly jaŋǧyrtyp, ekologiialyq taza tehnologiialardy engızudı ūsynady.
Ekonomikalyq baǧyttaǧy pıkırtalas ta jalǧasyn tapty. «Aq jol» partiiasy Aqtöbede jas käsıpkerlerdı, IT salasynyŋ jäne bank sektorynyŋ ökılderın bırıktırgen biznes-startaptar forumyn ötkızdı. Partiia töraǧasy Daniia Espaeva şaǧyn jäne orta biznestı qoldauǧa baǧyttalǧan sailaualdy baǧdarlamanyŋ negızgı bastamalaryn tanystyrdy.
Alaida däl osy ekonomikalyq ūsynystar Respublica partiiasynyŋ synyna ūşyrady. Pavlodardaǧy «Qyzyljar-Qūs KZ» qūs fabrikasynyŋ ūjymymen kezdesude partiia kandidaty Mahambet Hasenov «Aq joldyŋ» äleumettık maŋyzy bar azyq-tülık tauarlary baǧasyn memlekettık retteuden şyǧaru turaly bastamasyn täuekelı joǧary şeşım dep baǧalady. Onyŋ aituynşa, aldymen otandyq öndırıstı küşeitıp, halyqtyŋ tabysyn arttyru qajet.
Būǧan jauap retınde «Aq jol» partiiasynyŋ ökılı Iýrii Li partiia baǧdarlamasyndaǧy azamattardyŋ jekelegen sanattaryna qatysty salyq salu mäselelerı jönındegı ūstanymyn tüsındırdı.
Bır erekşelıgı – däl «Aq jol» men Respublica partiialary özara pıkırtalasqa özgelerge qaraǧanda jiırek tüsude. Öitkenı ekı partiia da bırdei elektoraldyq auditoriianyŋ qoldauyna ie boluǧa ūmtylyp jatyr.
Ärtürlı kün tärtıbın bırıktıretın ortaq maqsat
Köterılgen taqyryptardyŋ auqymy keŋ bolǧanyna qaramastan – zauyttardan bastap tabiǧi qoryqtarǧa deiın – partiialardyŋ barlyǧy sol künı qoǧamnyŋ bır ortaq sūranysyna jauap beruge ūmtyldy: özgerısterdıŋ naqty nätijesın körsetu. Bırı mūny tiımdı memlekettık basqaru men berık instituttar arqyly körse, endı bırı äleumettık qorǧau men auyldy damytuǧa basymdyq beredı. Al özgelerı ekologiiany qorǧaudy nemese käsıpkerlıktı damytuǧa qolaily jaǧdai jasaudy negızgı baǧyt retınde ūsynady.
