ۆەنەسۋەلادا بولعان جويقىن جەر سىلكىنىسى سالدارىنان قازا تاپقاندار سانى 5 398 ادامعا جەتتى، دەپ حابارلايدى "ادىرنا" ۇلتتىق پورتالى تاسس-قا سىلتەپ.
تابيعي اپاتتان مىڭداعان ادام جاراقات الىپ، باسپاناسىز قالدى. ۇلتتىق اسسامبلەياسىنىڭ توراعاسى حورحە رودريگەستىڭ مالىمەتىنشە، جەر سىلكىنىسى سالدارىنان 16 740 ادام ءتۇرلى دەڭگەيدە جاراقات العان. تاعى 17 907 تۇرعىن باسپاناسىنان ايىرىلعان. رەسمي دەرەككە سايكەس، اپات سالدارىنان 190 عيمارات تولىق قيراپ، 856 نىسانعا ەلەۋلى زاقىم كەلگەن.
ىزدەستىرۋ-قۇتقارۋ جۇمىستارى بارىسىندا 6 462 ادام امان-ەسەن قۇتقارىلعان. سونىمەن قاتار مەديتسينالىق مەكەمەلەردە 44 298 ادامعا قاجەتتى كومەك كورسەتىلگەن. بيلىكتىڭ مالىمەتىنشە، تابيعي اپاتتان زارداپ شەككەن 128 324 وتباسىعا گۋمانيتارلىق كومەك بەرىلگەن. ۋاقىتشا ۇيىمداستىرىلعان 107 لاگەرگە 23 335 ادام ورنالاستىرىلدى. سونداي-اق تۇرعىندارعا جالپى كولەمى 10 964 توننادان استام ازىق-تۇلىك جەتكىزىلگەن.
