اقش قارۋلى كۇشتەرى يرانعا قارسى بەس ساعاتقا سوزىلعان كەزەكتى اۋە سوققىلارى سەرياسىن اياقتادى. بۇل – امەريكالىق كۇشتەردىڭ يرانعا قاتارىنان 12-ءتۇن شابۋىل جاساۋى، دەپ حابارلايدى «ادىرنا» ءتىلشىسى.
«اقش اسكەرى يراننىڭ اسكەري نىساندارىنا، ونىڭ ىشىندە تەڭىز ينفراقۇرىلىمىنا، زىمىراندار مەن ۇشقىشسىز ۇشۋ اپپاراتتارىنىڭ قويمالارىنا، جاعالاۋداعى بارلاۋ بەكەتتەرى مەن اۋە قورعانىسى جۇيەلەرىنە سوققى جاسادى. بۇل شابۋىلدار يراننىڭ ازاماتتىق تەڭىزشىلەر مەن كوممەرتسيالىق كەمەلەرگە شابۋىل جاساۋ مۇمكىندىگىن ودان ءارى السىرەتتى»، – دەلىنگەن اقش ورتالىق قولباسشىلىعىنىڭ حابارلاماسىندا.
وسى ايدا امەريكالىق كۇشتەر يران اۋماعىنداعى ونداعان اسكەري نىسانعا سوققى بەرىپ، تەڭىزدەگى بلوكادانى قايتا جانداندىرعان.
«بۇگىنگى كۇنگە دەيىن CENTCOM كۇشتەرى توعىز كوممەرتسيالىق كەمەنىڭ باعىتىن وزگەرتىپ، ءبىر كەمەنى ىستەن شىعاردى. بۇل شارالار كەمەلەردىڭ يران پورتتارىنا كىرۋىنە نەمەسە ولاردان شىعۋىنا جول بەرمەۋ ماقساتىندا قابىلداندى»، – دەپ مالىمدەدى اقش اسكەري وكىلدەرى.
CENTCOM مالىمدەمەسىنەن كەيىن يراننىڭ اقپارات اگەنتتىكتەرى ەلدىڭ بىرنەشە وڭىرىندە جارىلىستار مەن زىمىراندىق شابۋىلدار بولعانىن حابارلادى. حۋزەستان پروۆينتسياسى بيلىگىنىڭ مالىمەتىنشە، احۆاز قالاسى ماڭىنداعى نىسانداردىڭ ءبىرى زىمىران سوققىسىنا ۇشىراعان. ال رامشير اۋدانىندا شابۋىل سالدارىنان اسفالت قويماسى زاقىمدانعان.
حورموزگان پروۆينتسياسىنداعى سيريك قالاسىنىڭ تۇرعىندارى بىرنەشە جارىلىس دىبىسىن ەستىگەنىن ايتقان. سونداي-اق اتوم ەلەكتر ستانتسياسى ورنالاسقان بۋشەر قالاسىندا ەكى جارىلىس بولعانى حابارلاندى. Tasnim اگەنتتىگىنىڭ جازۋىنشا، ماحشاحر پورتىندا دا جارىلىستار تىركەلگەن.
بۇعان دەيىن يراننىڭ اسكەري قولباسشىلىعى اقش ەلدىڭ يادرولىق نەمەسە قۇپيا نىساندارىنا شابۋىل جاساعان جاعدايدا، تەگەران امەريكالىق جانە اقش وداقتاستارىنىڭ نىساندارىنا سوققى بەرەتىنىن مالىمدەگەن ەدى.
