قازاقستان رەسپۋبليكاسىنىڭ مەملەكەتتىك اكادەميالىق بي تەاترىنا ونىڭ نەگىزىن قالاۋشى، كورنەكتى حورەوگراف بولات ايۋحانوۆتىڭ ەسىمى بەرىلدى. بۇل شەشىم مەملەكەت باسشىسى قاسىم-جومارت توقاەۆتىڭ تاپسىرماسى اياسىندا قابىلداندى، دەپ حابارلايدى "ادىرنا".
بولات ايۋحانوۆ – قازاقستانداعى كامەرالىق بالەت ونەرىنىڭ قالىپتاسۋىنا ولشەۋسىز ۇلەس قوسقان حورەوگراف. ول 1967 جىلى «الماتىنىڭ جاس بالەتى» ۇجىمىن قۇرىپ، كەيىن بۇل تەاتردى ەلىمىزگە عانا ەمەس، شەتەلگە دە تانىتتى. ونەر ۇجىمى كەڭەس وداعى رەسپۋبليكالارىندا، سونداي-اق ەۋروپا مەن سكانديناۆيا ەلدەرىندە گاسترولدىك ساپارلارمەن ونەر كورسەتىپ، حالىقارالىق دەڭگەيدە مويىندالدى.
بۇگىندە تەاتر ۇجىمى بولات ايۋحانوۆ قالىپتاستىرعان شىعارماشىلىق مەكتەپتىڭ ءداستۇرىن جالعاستىرىپ، ونىڭ مول مۇراسىن دارىپتەپ كەلەدى.
مادەنيەت جانە اقپارات مينيسترلىگىنىڭ مالىمەتىنشە، حورەوگرافتىڭ قويىلىمدارى ۇلتتىق حورەوگرافيا ونەرىنىڭ التىن قورىنا ەنگەن. سونىمەن قاتار ول ۇزاق جىلدار بويى كوپتەگەن كاسىبي بيشىلەردى تاربيەلەپ، قازاق بالەتىنىڭ دامۋىنا زور ۇلەس قوستى.
مينيسترلىك تەاترعا بولات ايۋحانوۆتىڭ ەسىمىنىڭ بەرىلۋى ونىڭ قازاق بالەت ونەرىن دامىتۋداعى ەلەۋلى ەڭبەگىنە كورسەتىلگەن قۇرمەت ەكەنىن اتاپ ءوتتى. بۇل شەشىم تەاتردىڭ 60-ماۋسىمىنىڭ اشىلۋى قارساڭىندا قابىلدانىپ وتىر.
ايتا كەتەيىك، 2027 جىلى مەملەكەتتىك اكادەميالىق بي تەاترىنىڭ قۇرىلعانىنا 60 جىل تولادى. مەرەيتوي قارساڭىندا تەاتر ۇجىمى كلاسسيكالىق، ۇلتتىق، نەوكلاسسيكالىق جانە زاماناۋي حورەوگرافيا باعىتتارىن دامىتۋدى جالعاستىرىپ، ۇلتتىق بالەت مەكتەبىنىڭ ۇزدىك داستۇرلەرىن ساقتاپ كەلەدى.
