الماتىدا اپتاپ ىستىق كوپجىلدىق تەمپەراتۋرالىق رەكوردتاردى جاڭارتتى، دەپ حابارلايدى "ادىرنا" ءتىلشىسى.
بۇل تۋرالى «قازگيدرومەت» رمك الماتى قالاسى جانە الماتى وبلىسى بويىنشا مەتەورولوگيالىق بولجامدار ءبولىمىنىڭ باسشىسى داۋلەت كىسەباەۆ حابارلاعان.
ماماننىڭ ايتۋىنشا، 17 شىلدەدە الماتىدا اۋا تەمپەراتۋراسى +39,2 گرادۋسقا جەتكەن. بۇعان دەيىن وسى كۇنگە تيەسىلى ەڭ جوعارى كورسەتكىش 1945 جىلى تىركەلىپ، +37,4 گرادۋستى قۇراعان. وسىلايشا جاڭا رەكورد بۇرىنعى مەجەدەن 1,8 گرادۋسقا جوعارى بولدى.
18 شىلدەدە قالادا اۋا تەمپەراتۋراسى +40 گرادۋسقا دەيىن كوتەرىلىپ، بۇل كۇنگە ارنالعان تاعى ءبىر رەكورد جاڭاردى. الدىڭعى ەڭ جوعارى كورسەتكىش +39,7 گرادۋس بولىپ، 1997 جىلى تىركەلگەن.
19 شىلدەدە الماتىدا اۋا تەمپەراتۋراسى +41,2 گرادۋسقا جەتكەنىمەن، بۇل كۇننىڭ ابسوليۋتتىك رەكوردى جاڭارعان جوق. ويتكەنى 19 شىلدەگە ارنالعان ەڭ جوعارى تەمپەراتۋرا +41,7 گرادۋس بولىپ، 1997 جىلى تىركەلگەن.
بۇعان دەيىن، 16 شىلدەدە دە الماتىدا اۋا تەمپەراتۋراسى +38 گرادۋسقا دەيىن كوتەرىلىپ، 1976 جىلعى +36,1 گرادۋس دەڭگەيىندەگى رەكوردتان اسىپ تۇسكەن ەدى.
