Foto: ANTONIO MASIELLO/GETTY IMAGES
Mausym aiynyŋ ekınşı jartysynda Batys Europada tırkelgen rekordtyq ystyq saldarynan kemınde 12 myŋ adam mezgılsız qaitys boldy. Mūndai derektı 16 şıldede AFP agenttıgı Belgiia, Germaniia, İspaniia, Liuksemburg, Niderland, Fransiia jäne Şveisariia elderınıŋ mälımetterın qorytyndylai otyryp jariialady, dep habarlaidy “Adyrna”.
Taldauǧa säikes, 22–28 mausym aralyǧynda, atalǧan jetı elde ötken jyldardaǧy osy kezeŋmen salystyrǧanda şamamen 10 myŋ adamǧa artyq ölım tırkelgen. Al Ūlybritaniianyŋ Meteorologiialyq qyzmetınıŋ mälımetınşe, 18–28 mausym aralyǧynda Angliia men Uelste taǧy 2200-ge juyq ölım tırkelgen. AFP zertteuı Şyǧys Europa elderın qamtymaǧan.
Düniejüzılık densaulyq saqtau ūiymynyŋ (DDŪ) Europalyq öŋırlık biurosynyŋ direktory Hans Kliuge mūndai ölımderdıŋ basym bölıgınıŋ aldyn aluǧa bolatynyn aitty. Onyŋ sözınşe, qajettı ūsynymdar būrynnan jariialanǧanyna qaramastan, köptegen ükımetter aptap ystyqty qoǧamdyq densaulyq saqtau salasyndaǧy tötenşe jaǧdai emes, jai ǧana aua raiy qūbylysy retınde qabyldap keledı.
«Ükımettıŋ būdan keiın qandai äreket jasaityny – öz taŋdauy. Biylǧy jaz mäselenıŋ qanşalyqty maŋyzdy ekenın körsettı», – dedı ol.
Germaniianyŋ Federaldyq statistika basqarmasynyŋ mälımetınşe, 22–28 mausym aralyǧynda kei öŋırlerde aua temperaturasy 41 gradus Selsiiden asyp, osy kezeŋde şamamen 23,9 myŋ adam qaitys bolǧan. Būl ekı apta būrynǧy körsetkışten 7100 adamǧa köp.
Al būǧan deiın Robert Koh instituty (RKI) mausymnyŋ asa ystyq aptasynda 4310 artyq ölım, al jalpy mausym aiynda şamamen 5100 artyq ölım bolǧanyn baǧalaǧan.
Būǧan deiın DDŪ men Europalyq aurulardyŋ aldyn alu jäne baqylau ortalyǧynyŋ (ECDC) qoldauymen jūmys ısteitın EuroMOMO baǧdarlamasy Europada aptap ystyqtan 10 myŋnan astam adamnyŋ qaitys bolǧanyn habarlaǧan edı. Zertteu 27 europalyq eldıŋ ūlttyq statistikasyna negızdelgen.
Mälımetterge säikes, aptap ystyqqa bailanysty qaitys bolǧandardyŋ basym bölıgı 65 jastan asqan adamdar. Öitkenı aua temperaturasynyŋ şamadan tys köterıluı kün ötudı ǧana emes, jürek-qan tamyrlary jäne tynys alu jüiesı aurularynyŋ asqynuyn da tuyndatady. Mūndai qauıpke egde jastaǧy adamdar äldeqaida osal keledı.
