قىرعىزستان پرەزيدەنتى سادىر جاپاروۆ رەفەرەندۋم تۋرالى كونستيتۋتسيالىق زاڭنىڭ جاڭا رەداكتسياسىنا قول قويدى، دەپ حابارلايدى "ادىرنا" ءتىلشىسى.
ەندى جالپىحالىقتىق رەفەرەندۋم وتكىزۋ تۋرالى شەشىمدى تەك مەملەكەت باسشىسى قابىلدايدى.
جاڭا زاڭعا سايكەس، رەفەرەندۋم بۇدان بىلاي پرەزيدەنتتىڭ جارلىعىمەن تاعايىندالادى. جارلىقتا داۋىس بەرۋ كۇنى، رەفەرەندۋمعا شىعارىلاتىن سۇراقتاردىڭ ناقتى تۇجىرىمى جانە وزگە دە راسىمدەر كورسەتىلەدى. داۋىس بەرۋ كۇنى جارلىق كۇشىنە ەنگەننەن كەيىن ءتورت ايدان كەشىكتىرىلمەي، دەمالىس كۇنىنە بەلگىلەنۋى ءتيىس.
قۇجاتتاعى تاعى ءبىر جاڭاشىلدىق – قاشىقتان ەلەكتروندى داۋىس بەرۋ مۇمكىندىگىنىڭ ەنگىزىلۋى. مۇنداي فورماتتى قولدانۋ تۋرالى شەشىم ءاربىر رەفەرەندۋمدى تاعايىنداۋ كەزىندە جەكە قابىلدانادى.
زاڭعا سايكەس، رەفەرەندۋمدا قابىلدانعان شەشىم بۇكىل ەل اۋماعىندا مىندەتتى كۇشكە يە بولادى جانە قوسىمشا بەكىتۋدى قاجەت ەتپەيدى.
جالپىحالىقتىق داۋىس بەرۋگە كونستيتۋتسيا جوباسى، جەكەلەگەن زاڭ جوبالارى مەن مەملەكەتتىك ماڭىزى بار وزگە دە ماسەلەلەر شىعارىلۋى مۇمكىن. سونىمەن قاتار، قويىلاتىن سۇراق ناقتى ءارى ءبىرماندى جاۋاپ بەرۋگە مۇمكىندىك بەرەتىندەي ەتىپ تۇجىرىمدالۋى ءتيىس.
زاڭدا رەفەرەندۋمعا شىعارۋعا تىيىم سالىنعان ماسەلەلەر دە ناقتىلانعان. اتاپ ايتقاندا، پرەزيدەنت پەن پارلامەنت دەپۋتاتتارىنىڭ وكىلەتتىگىن مەرزىمىنەن بۇرىن توقتاتۋ نەمەسە ۇزارتۋ، مەرزىمىنەن بۇرىن سايلاۋ وتكىزۋ، سوعىس پەن بەيبىتشىلىك، سالىقتار مەن تاريفتەر، مەملەكەتتىڭ زايىرلى سيپاتى، اۋماقتىق تۇتاستىق، اكىمشىلىك-اۋماقتىق قۇرىلىم، مەملەكەتتىك شەكارالار، راقىمشىلىق پەن كەشىرىم جاساۋ، رەسپۋبليكالىق بيۋدجەتتى قابىلداۋ سياقتى ماسەلەلەر بويىنشا رەفەرەندۋم وتكىزۋگە بولمايدى.
جاڭا زاڭعا سايكەس، رەفەرەندۋم وتكىزۋ باستاماسىن قىرعىزستان پرەزيدەنتى، كەمىندە 300 مىڭ سايلاۋشى، جوعارى كەڭەستىڭ دەپۋتاتتارىنىڭ جالپى سانىنىڭ ۇشتەن ەكىسى كوتەرە الادى.
پرەزيدەنت قول قويعان زاڭ 2026 جىلدىڭ 21 شىلدەسىندە كۇشىنە ەنەدى. ال قولدانىستاعى زاڭ بويىنشا رەفەرەندۋم تاعايىنداۋ قۇقىعى پارلامەنتتىڭ قۇزىرىندا بولىپ كەلگەن.
