فوتو:istockphoto
حالىقارالىق Numbeo پلاتفورماسىنىڭ 2026 جىلدىڭ العاشقى جارتىجىلدىعىنا ارنالعان جاڭارتىلعان رەيتينگىندە الماتى ورتالىق ازياداعى ءومىر ءسۇرۋ قۇنى ەڭ جوعارى قالا رەتىندە تانىلدى، دەپ حابارلايدى "ادىرنا".
الەمنىڭ 547 ءىرى قالاسىن قامتىعان زەرتتەۋدە الماتى 409-ورىنعا جايعاسسا، استانا 469-ورىننان كورىندى. ساراپشىلار قالالارداعى ءومىر ءسۇرۋ دەڭگەيىن نيۋ-يوركتى (100 بالل) بازالىق كورسەتكىش رەتىندە الىپ، بىرنەشە نەگىزگى يندەكس بويىنشا باعالاعان.
زەرتتەۋ ناتيجەسىنە سايكەس، الماتىنىڭ ءومىر ءسۇرۋ قۇنى يندەكسى 38,7 باللدى قۇرادى. تۇرعىن ءۇيدى جالعا الۋ كورسەتكىشى – 16,2, ال جالداۋ اقىسىن قوسا ەسەپتەگەندەگى جيىنتىق يندەكس 28,4 باللعا جەتكەن.
ال استانادا بۇل كورسەتكىشتەر ايتارلىقتاي تومەن. ەلورداداعى ءومىر ءسۇرۋ قۇنى يندەكسى – 32,8, پاتەر جالداۋ قۇنى – 12,6, ال جالپى جيىنتىق يندەكس 23,6 بالل بولدى. بۇل الماتىدا كۇندەلىكتى شىعىندار مەن تۇرعىن ءۇيدى جالعا الۋ باعاسى استاناعا قاراعاندا جوعارى ەكەنىن كورسەتەدى.
ورتالىق ازيا قالالارى اراسىنداعى رەيتينگتە العاشقى ەكى ورىندى قازاقستاننىڭ مەگاپوليستەرى يەلەندى. تىزىمدە الماتى ءبىرىنشى، استانا ەكىنشى ورىندا تۇر. ال العاشقى بەستىككە وزبەكستاننىڭ تاشكەنتى، قىرعىزستاننىڭ بىشكەگى جانە تاجىكستاننىڭ دۋشانبەسى دە ەنگەن.
الەمدىك رەيتينگتىڭ كوشىن ءداستۇرلى تۇردە شۆەيتساريا قالالارى باستاپ كەلەدى. بيىل ءومىر ءسۇرۋ قۇنى ەڭ جوعارى قالا رەتىندە تسيۋريح تانىلدى. ال العاشقى بەستىككە كايمان ارالدارىنداعى دجوردجتاۋن، سونداي-اق شۆەيتساريانىڭ ليۋتسەرن، بازەل جانە جەنەۆا قالالارى كىردى.
Numbeo رەيتينگىن جاساۋ كەزىندە ازىق-تۇلىك باعاسى، قوعامدىق تاماقتانۋ ورىندارىنداعى قىزمەت قۇنى، تۇرعىن ءۇيدى جالعا الۋ باعاسى جانە حالىقتىڭ ناقتى ساتىپ الۋ قابىلەتى سياقتى نەگىزگى كورسەتكىشتەر ەسكەرىلەدى.
