الماتى قالاسىندا بىرنەشە نوميناتسيالار بويىنشا ءدىن سالاسىنىڭ وزەكتى ماسەلەلەرى تۋرالى ۇزدىك ماتەريالداردى ونىڭ ىشىندە ماقالالار، قىسقا روليكتەر جانە ت.ب. دايىنداۋ بايقاۋىنىڭ جەڭىمپازدارىن ماراپتتالدى، دەپ جازادى «ادىرنا» پورتالى.
الماتى قالاسى ءدىن ىستەرى جونىندەگى باسقارماسىنىڭ تاپسىرىسى بويىنشا «JASTAR» دامىتۋ ورتالىعى» جاستار قوعامدىق بىرلەستىگى ۇيىمداستىرۋىمەن وتكەن بايقاۋ، اعىمداعى جىلدىڭ 5 ءساۋىر مەن 15 قازان ارالىعىندا وزەكتى بولدى. نەگىزگى ماقسات – جۇرت نازارىن ءدىن سالاسىنداعى مەملەكەتتىك ساياساتتىڭ وزەكتى ماسەلەلەرىنە اۋدارۋ. بۇقارالىق اقپارات قۇرالدارى مەن الەۋمەتتىك جەلىلەر ارقىلى حالىقتى ءدىن سالاسىنداعى مەملەكەتتىك ساياساتتىڭ ماڭىزدى باعىتتارى مەن ءدىني ەكسترەميستىك اعىمدار يدەولوگياسىنىڭ زياندىلىعىنان حاباردار ەتۋ.
جەڭىمپازدار ينتەرنەت-رەسۋرستاعى قازاق تىلىندەگى ۇزدىك ماقالا; ينتەرنەت-رەسۋرستاعى ورىس تىلىندەگى ۇزدىك ماقالا; ينتەرنەتتەگى جانە الەۋمەتتىك جەلىلەردەگى ەڭ جاقسى تاقىرىپتىق قىسقا بەينەروليك; ەڭ بەلسەندى بلوگەر نوميناتسيالارى بويىنشا انىقتالدى. اتالعان 4 نوميناتسيا بويىنشا جالپى جۇلدە قورى – 1 350 000 تەڭگەنى قۇرادى.
قازىلار القاسى مۇشەلەرى قاتىسۋشىلاردىڭ ماتەريالدارىنا ءادىل باعا بەرىپ، ولاردىڭ كرەاتيۆتى يدەيالارى مەن ساپالى جۇمىستارىنا باسا نازار اۋداردى.
قازىلار قاتارىندا الماتى قالاسى ءدىن ىستەرى جونىندەگى باسقارماسى باسشىسىنىڭ ورىنباسارى ەرعالي احيلبەكۇلى، ءال-فارابي اتىنداعى قازۇۋ ءدىنتانۋ جانە مادەنيەتتانۋ كافەدراسى مەڭگەرۋشىسى اينۋر قۇرماناليەۆا، الماتى قالاسى ءدىن ىستەرى جونىندەگى باسقارماسىنىڭ ء"دىن ماسەلەلەرىن زەرتتەۋ ورتالىعى" كوممۋنالدىق مەملەكەتتىك مەكەمەسىنىڭ باسشىسى دۋلات يبراگيموۆ، اقىن تورەعالي تاشەنوۆ بولدى.
ماراپاتتاۋ ءراسىمىن ەرعالي احيلبەكۇلى مەن اينۇر قۇرماناليەۆا اشىپ بەردى. ولار اتالعان بايقاۋدىڭ قوعام ءۇشىن بەرەرى مەن قوسارى مول ەكەنىن، سونداي-اق ءدىن تاقىرىبىنا قىزىعۋشى كوزى اشىق جاستاردىڭ كوبەيگەنىنە شىن جۇرەكتەن قۋانىشتى ەكەندەرىن ايتتى.
«كوپشىلىگىڭىز بىلەسىزدەر، قازىر ءدىن تاقىرىبى ەل اۋزىندا ءجيى تالقىلانۋدا. ءبىزدىڭ ماقساتىمىز جات اعىمنىڭ ارتىنان اداسۋشى جاستاردىڭ باعىتىن تۇزەپ، كوزىن اشۋ. بۇل بايقاۋدا وسى ماقسات نەگىزىندە جۇزەگە اسقان بولاتىن. مەن ماقالالار مەن ماتەريالداردى تەكسەرۋ بارىسىندا ءدىن تاقىرىبىنا شىنايى جانى اشىپ، الەۋمەتتىك ماسەلەگە وزىندىك جاقسىلىعىن تيگىزگىسى كەلەتىن جاناشىر جاستاردىڭ بار ەكەنىن ۇعىنىپ شىنايى قۋاندىم. باستىسى ەلىم دەيتىن ەر بولسا، ەرىم دەيتىن ەل تابىلادى»، - دەدى الماتى قالاسى ءدىن ىستەرى جونىندەگى باسقارماسى باسشىسىنىڭ ورىنباسارى ەرعالي كوشەكە.
ماقالالار جولداعان قاتىسۋشىلار اراسىنان ىنتالاندىرۋ سەرتيفيكاتتارى مەن قارجىلاي سىيلىققا ساۋلە يساباەۆا، بەكنۇر كيسيكوۆ، ابزەلبەك شىنار، نۇرمۇحاممەد مەيمانقوجا، شاعىرباي الماسبەك ەسىمدى جاستار يە بولدى. ءىرى قارجىلاي سىيلىقتار يەلەنگەندەر قاتارىنان قازاق تىلىندەگى ينتەرنەت-رەسۋرس ماقالاسى بويىنشا قانات سۇلەيمەنوۆ – 250 000 تگ، ورىس تىلىندە داستان ەلدەسوۆ – 250 000 تگ، ۇزدىك قىسقا بەينەروليك نوميناتسياسى بويىنشا – ەرسۇلتان راحيمبەك، ولجاس ايتپانوۆ، اسحات بايتورە قانجىعالى بولدى. ال ەڭ بەلسەندى بلوگەر جۇلدەسى – ەلنار بەرىكباەۆقا بۇيىردى.
بەينەروليك اۆتورلارى ءدىن تاقىرىبىندا تۇسىرگەن ۆيدەولارىن جينالعان كوپشىلىككە كورسەتىپ وڭ باعالارىن الدى. سونداي-اق ولار ءتۇسىرىلىم كەزىندەگى قىزىقتارىمەن ءبولىستى.
سونىمەن قاتار قازىرگى تاڭدا جاستار اراسىندا الەۋمەتتىك جەلىدە ءدىن سالاسى بويىنشا كونتەنت تاراتىپ جۇرگەن بلوگەر ەلنار بەرىكباەۆ تا اتالمىش ءىسىنىڭ ازاماتتىق مىندەتى ەكەنىن اتاي كەتتى.
«قازىرگى تاڭدا تيك توك جەلىسى مەن ينستاگرامدا ءداستۇر مەن سالت، ءدىن مەن مادەنيەتكە قاتىستى تىڭ دەرەكتەرمەن ءبولىسىپ وتىرامىن. ۆيدەولار كوبىنە قىزىق. 800 مىڭنان استام قارالىم جيناپ وتىرادى. اۋەلگى ماقساتىم – جاستاردىڭ سالت-داستۇرگە دەگەن جاناشىرلىعىن وياتۋ، ءدىني كوزقاراسىن تۇزەۋ. بلوگ جۇرگىزۋ مەنىڭ ءارى ءحوببيىم، ءارى ازاماتتىق مىندەتىم. سەبەبى العان ءبىلىمىمدى وزگەلەرمەن ءبولىسىپ وتىرعىم كەلەدى»، - دەدى ەلنار بەرىكباەۆ.
ايتا كەتەيىك، الماتى قالاسى ءدىن ىستەرى باسقارماسى اتالمىش بايقاۋدى جىل سايىن ۇيىمداستىرىپ كەلەدى.
«ادىرنا» ۇلتتىق پورتالى
