قىتاي حالىق رەسپۋبليكاسىنىڭ توراعاسى، قىتاي كوممۋنيستىك پارتياسىنىڭ باس حاتشىسى سي تسزينپين ەلدىڭ دامۋىنا ەرەكشە ۇلەس قوسقان سەگىز ازاماتقا پارتيانىڭ ەڭ جوعارى ماراپاتى – «1 شىلدە» وردەنىن تابىستادى، دەپ حابارلايدى «ادىرنا» ءتىلشىسى.
ماراپاتتالعانداردىڭ قاتارىندا قازاق دارىگەرى وقاس سۇلەيمەن دە بار. ول وسى جوعارى ماراپاتقا يە بولعان العاشقى قازاق اتاندى.
وقاس سۇلەيمەن 40 جىلدان استام ۋاقىت بويى شىڭجاڭ ۇيعىر اۆتونوميالىق اۋدانىنداعى ءدوربىلجىن اۋدانىندا ەڭبەك ەتكەن. ول ونداعان جىل بويى اپتاپ ىستىققا، قاقاعان ايازعا جانە وزگە دە قولايسىز اۋا رايىنا قاراماستان، شالعايداعى مالشىلاردىڭ قونىستارىنا اتپەن بارىپ، مەديتسينالىق كومەك كورسەتكەن.
ەڭبەك جولىندا دارىگەر 100 مىڭنان استام ناۋقاستى قابىلداپ، مىڭداعان ادامنىڭ ءومىرىن ساقتاپ قالعان جانە 3200-دەن استام ءسابيدىڭ دۇنيەگە كەلۋىنە كومەكتەسكەن.
ايتا كەتەيىك، 2017 جىلدىڭ 22 شىلدەسىنەن باستاپ قولدانىسقا ەنگىزىلگەن «1 شىلدە» وردەنى – قىتايداعى ەڭ بەدەلدى پارتيالىق ماراپاتتاردىڭ ءبىرى. وسى ۋاقىتقا دەيىن بۇل ناگراداعا نەبارى 37 ادام عانا يە بولعان.
