يلون ماسكتىڭ SpaceX كومپانياسى باعدارلامالاۋعا ارنالعان تانىمال جاساندى ينتەللەكت قۇرالى Cursor-دى ازىرلەگەن Anysphere ستارتاپىن ساتىپ الاتىنىن رەسمي تۇردە راستادى، دەپ حابارلايدى "ادىرنا".
اقش-تىڭ باعالى قاعازدار جانە بيرجالار جونىندەگى كوميسسياسىنا (SEC) تاپسىرىلعان قۇجاتتارعا سايكەس، مامىلە تولىقتاي اكتسيالار ارقىلى جۇزەگە اسىرىلادى. كەلىسىم اياسىندا Anysphere كومپانياسىنىڭ قۇنى 60 ميلليارد دوللارعا باعالانعان.
بۇل ىقتيمال ساتىپ الۋ تۋرالى اقپارات العاش رەت 2026 جىلدىڭ ءساۋىر ايىندا تاراعان بولاتىن. ساراپشىلار كۇتكەندەي، مامىلەنىڭ ەگجەي-تەگجەيى SpaceX كومپانياسىنىڭ IPO-عا شىعۋىنان كەيىن جاريالاندى.
كەلىسىم بويىنشا SpaceX-ءتىڭ ەنشىلەس قۇرىلىمى X67 Inc. Cursor كومپانياسىمەن بىرىكتىرىلەدى. دەگەنمەن، Cursor ءوز قىزمەتىن SpaceX-كە تولىقتاي تيەسىلى كومپانيا رەتىندە جالعاستىرا بەرەدى.
SpaceX ساتىپ الۋ ءراسىمىن بارلىق قاجەتتى رەتتەۋشى ورگانداردىڭ ماقۇلداۋىنان كەيىن 2026 جىلدىڭ ءۇشىنشى توقسانىندا اياقتاۋدى جوسپارلاپ وتىر.
بۇل مامىلە يلون ماسك كومپانياسىنىڭ جاساندى ينتەللەكت سالاسىنداعى پوزيتسياسىن كۇشەيتۋگە باعىتتالعان. اقپان ايىندا xAI كومپانياسىن ءوز قۇرامىنا قوسقاننان كەيىن Grok مودەلى باعدارلامالاۋ مىندەتتەرىن ورىنداۋدا Anthropic, OpenAI جانە Google كومپانيالارىنىڭ شەشىمدەرىنەن قالىپ قويعان ەدى.
ال Cursor بۇگىندە باعدارلامالاۋعا ارنالعان جاساندى ينتەللەكت قۇرالدارى نارىعىنداعى ەڭ قارقىندى دامىپ كەلە جاتقان ونىمدەردىڭ ءبىرى سانالادى. سوندىقتان Anysphere-ءدى ساتىپ الۋ SpaceX-ءتىڭ بۇل باعىتتاعى باسەكەلەستىك الەۋەتىن ەداۋىر ارتتىرۋى مۇمكىن.
