بۇگىن، 18 ماۋسىمدا اقوردادا مەديتسينا قىزمەتكەرى كۇنىنە وراي سالتاناتتى ءىس-شارا ءوتتى، دەپ حابارلايدى «ادىرنا» ءتىلشىسى.
جيىندا مەملەكەت باسشىسى قاسىم-جومارت توقاەۆ دارىگەرلەردى كاسىبي مەرەكەسىمەن قۇتتىقتاپ، ءسوز سويلەدى.
«ەڭ الدىمەن، بارشاڭىزعا مەديتسينا قىزمەتكەرى كۇنى قۇتتى بولسىن دەيمىن. وتكەن جىلى ءبىز ارداقتى كاسىپ يەلەرى – مەديتسينا ماماندارىن العاش رەت اقورداعا شاقىرىپ، قۇرمەت كورسەتتىك. بيىل دا يگى داستۇرگە ساي وزدەرىڭىزدى وسى جەردە كورگەنىمە وتە ريزامىن.
شىن مانىندە، دەنساۋلىق ساقتاۋ سالاسىندا قوعام يگىلىگى ءۇشىن ادال قىزمەت ەتىپ جۇرگەن ءار قىزمەتكەردىڭ ەڭبەگى ەرەن. حالقىمىز سىزدەردى ەڭ قادىرلى ماماندىق يەسى رەتىندە سىيلايدى جانە قۇرمەتتەيدى. تۇپتەپ كەلگەندە، مەديتسينا ماماندارى ەلىمىزدىڭ باستى بايلىعى – ازاماتتارىمىزدىڭ دەنساۋلىعىن نىعايتۋعا ولشەۋسىز ۇلەس قوسىپ كەلەدى. مەن مەملەكەت باسشىسى رەتىندە وسى سالادا تاباندى ەڭبەك ەتىپ جۇرگەن بارشا قىزمەتكەرگە شىنايى ريزاشىلىعىمدى بىلدىرەمىن»،–دەدى ول.
مەملەكەت باسشىسى دەنساۋلىق ساقتاۋ سالاسىنداعى جەتىستىكتەرگە دە توقتالدى.
«بارشاڭىزعا بەلگىلى، مەملەكەت مەديتسينا سالاسىن دامىتۋعا ءاردايىم باسا نازار اۋدارادى. قازىر دە وسى باعىتتا اۋقىمدى جۇمىس ىستەلىپ جاتىر. ناقتى ناتيجەلەر بار. بىلتىر ەلىمىز بويىنشا ازاماتتاردىڭ ورتاشا ءومىر ءسۇرۋ ۇزاقتىعى 76 جاسقا جاقىندادى. سوڭعى ءۇش جىلدا انا ءولىمى 35 پايىزعا، ال ءسابي ءولىمى 24 پايىزعا قىسقاردى. بۇل – تاۋەلسىزدىك جىلدارىنداعى ەڭ تومەنگى كورسەتكىش. كەيىنگى جەتى جىلدا ەلىمىز بويىنشا 1300-گە جۋىق دەنساۋلىق ساقتاۋ نىسانى سالىندى»،–دەدى قاسىم-جومارت توقاەۆ.
ونىڭ سوزىنشە، قازىرگى تاڭدا دەنساۋلىق ساقتاۋ جۇيەسىندە 280 مىڭنان استام مامان قىزمەت ەتەدى.
«مەديتسينا قىزمەتكەرلەرىنىڭ مارتەبەسىن كوتەرۋ جانە بەدەلىن كۇشەيتۋ ەلىمىز ءۇشىن باسىمدىققا يە مىندەت بولىپ قالا بەرەدى. دارىگەرلەردىڭ قاۋىپسىزدىگىن قاتاڭ قاداعالاۋ جۇمىسى ايرىقشا نازاردا بولۋعا ءتيىس. وسى ماسەلەگە بىلتىر كاسىبي مەرەكە قارساڭىندا وتكەن جيىندا ارنايى توقتالدىم. سول سەبەپتى مەن وسى جىلدىڭ باسىندا مەديتسينا قىزمەتكەرلەرىنە كۇش كورسەتكەن ادامداردى قىلمىستىق جاۋاپكەرشىلىككە تارتۋ تۋرالى زاڭعا قول قويدىم. بۇل شەشىم قوعامىمىزدا بەرىك ورنىعىپ جاتقان زاڭ مەن ءتارتىپ قاعيداتىنا تولىق ساي كەلەدى»,–دەدى پرەزيدەنت.
