استاناداعى حالىققا قىزمەت كورسەتۋ ورتالىعىنىڭ قىزمەتكەرلەرى شەتەل ازاماتتارىنا قازاقستانعا كەلمەي-اق جەكە سايكەستەندىرۋ ءنومىرىن (جسن) زاڭسىز راسىمدەپ بەرگەن، دەپ حابارلايدى "ادىرنا".
قارجى مونيتورينگ اگەنتتىگى مەملەكەتتىك ورگانداردىڭ اقپاراتتىق جۇيەلەرى مەن سىبايلاس جەمقورلىق تەتىكتەرىن پايدالانۋ ارقىلى شەتەل ازاماتتارىنا جەكە سايكەستەندىرۋ ءنومىرىن (جسن) زاڭسىز راسىمدەۋ سحەماسىن انىقتادى.
"قولدانىستاعى زاڭناماعا سايكەس شەتەل ازاماتتارىنا جسن بەرۋ ولاردىڭ قازاقستان اۋماعىندا جەكە قاتىسۋى جانە مىندەتتى بيومەتريالىق سايكەستەندىرۋدەن ءوتۋى ارقىلى عانا جۇزەگە اسىرىلادى. الايدا 2024–2025 جىلدارى ءوتىنىش بەرۋشىلەردىڭ ەلگە كەلۋىنسىز-اق جسن راسىمدەۋگە زاڭسىز كومەكتەسەتىن قىلمىستىق سحەما ۇيىمداستىرىلعان",- دەپ مالىمدەدى ۆەدومستۆو.سحەمانى جۇزەگە اسىرۋ ءۇشىن الەۋمەتتىك جەلىدەگى ارنا پايدالانىلىپ، سول ارقىلى جسن-دى قاشىقتان الۋعا مۇددەلى شەتەل ازاماتتارى ىزدەستىرىلىپ، تارتىلعان.
"قىلمىستىق ارەكەتكە "ازاماتتارعا ارنالعان ۇكىمەت" مەملەكەتتىك كورپوراتسياسى" كەاق-نىڭ استانا قالاسى بويىنشا فيليالىنىڭ قىزمەتكەرلەرى تارتىلعان. ولار حقكو اقپاراتتىق جۇيەسىنە كورىنەۋ جالعان مالىمەتتەر ەنگىزىپ، جسن الۋعا قاتىستى جالعان وتىنىمدەر راسىمدەگەن. زاڭسىز سىياقى دەلدالدار ارقىلى بانك اۋدارىمدارى تۇرىندە بەرىلىپ، كەيىن سحەماعا قاتىسۋشىلار اراسىندا بولىنگەن",- دەپ تولىقتىردى قما.قىلمىستىق ءىس سوتقا جولداندى.
ۇقساس جاڭالىقتار
