فوتو: Reuters
11 ماۋسىمدا مەكسيكادا 2026 جىلعى فۋتبولدان الەم چەمپيوناتىنىڭ رەسمي اشىلۋ سالتاناتى ءوتتى. بيىلعى دودا تاريحتا العاش رەت ءۇش مەملەكەت – اقش، كانادا جانە مەكسيكانىڭ اۋماعىندا ۇيىمداستىرىلىپ وتىر. تۋرنيرگە الەمنىڭ 48 قۇراماسى قاتىسىپ، بۇل كورسەتكىش الەم چەمپيوناتتارى تاريحىنداعى رەكورد بولىپ سانالادى.
اشىلۋ ءراسىمى مەحيكوداعى ايگىلى «اتستەكا» ستاديونىندا ءوتتى. سالتاناتتى شارادا الەمدىك مۋزىكا جۇلدىزدارى ونەر كورسەتىپ، كورەرمەندەرگە اسەرلى شوۋ ۇسىندى. ولاردىڭ قاتارىندا كولۋمبيالىق ءانشى شاكيرا، رەپەر دجەي بالۆين جانە نيگەريالىق ورىنداۋشى Burna Boy بولدى. سونىمەن قاتار، ءتۋرنيردىڭ رەسمي ءانۇرانى ورىندالىپ، الەم چەمپيوناتىنىڭ باستالعانى جاريالاندى.
چەمپيوناتتىڭ العاشقى ماتچىندا الاڭ يەسى مەكسيكا قۇراماسى وڭتۇستىك افريكا رەسپۋبليكاسىنىڭ كومانداسىمەن كەزدەسىپ، 2:0 ەسەبىمەن جەڭىسكە جەتتى. وسىلايشا، مەكسيكالىق فۋتبولشىلار جارىستى ءساتتى باستاپ، توپتىق كەزەڭدەگى العاشقى ءۇش ۇپايىن ەنشىلەدى.
2026 جىلعى الەم چەمپيوناتى بۇرىن-سوڭدى بولماعان اۋقىمىمەن ەرەكشەلەنەدى. تۋرنير بارىسىندا 16 قالادا 104 ماتچ وتكىزۋ جوسپارلانعان. فينالدىق كەزدەسۋ 19 شىلدەدە اقش-تىڭ نيۋ-دجەرسي شتاتىنداعى MetLife ستاديونىندا وتەدى.
بيىلعى چەمپيوناتقا الەمنىڭ تۇكپىر-تۇكپىرىنەن كەلگەن 48 قۇراما قاتىسۋدا. ولاردىڭ قاتارىندا ازيا قۇرلىعىنىڭ وكىلدەرى – يران مەن وزبەكستان قۇرامالارى دا بار. وزبەكستان ۇلتتىق قۇراماسى ءوز تاريحىندا تۇڭعىش رەت الەم چەمپيوناتىنىڭ فينالدىق كەزەڭىنە جولداما الىپ، تاريحي جەتىستىككە قول جەتكىزدى. سونىمەن قاتار، يران قۇراماسى دا كەزەكتى رەت الەمدىك دوداعا قاتىسىپ، قۇرلىقتاعى ۇزدىك كوماندالاردىڭ ءبىرى ەكەنىن دالەلدەمەك. تاياۋ شىعىستاعى يزرايل مەن اقش-تىڭ يرانمەن قاقتىعىسۋى وسى ەل كومانداسىنىڭ اقش-قا دوداعا قاتىسۋىنا دا اسەر ەتپەي قويمادى. قازىر يران كومانداسىنىڭ جانكۇيەرلەرىنە ۆيزا بەرىلمەۋى داۋلى بولىپ جاتىر.
قاتىسۋشىلار سانىنىڭ 32-دەن 48-گە دەيىن ۇلعايۋىنىڭ ارقاسىندا وزبەكستان، يوردانيا، كابو-ۆەردە جانە كيۋراساو قۇرامالارى العاش رەت الەم چەمپيوناتىنىڭ فينالدىق كەزەڭىندە ونەر كورسەتۋ مۇمكىندىگىنە يە بولدى.
تۋرنيرگە دايىندىق بارىسىندا بىرقاتار ماسەلەلەر دە تۋىندادى. بيلەت باعالارىنىڭ اسپانداۋى مەن قوناقۇي قىزمەتتەرىنىڭ قىمباتتاۋى جانكۇيەرلەر تاراپىنان سىنعا ۇشىرادى. سونىمەن قاتار، مەحيكودا وتكەن نارازىلىق اكتسيالارى قاۋىپسىزدىك شارالارىن كۇشەيتۋگە سەبەپ بولدى.
سوعان قاراماستان، الەمدەگى ەڭ بەدەلدى فۋتبول ءتۋرنيرى ءوز جۇمىسىن باستاپ كەتتى. الداعى ءبىر ايدان استام ۋاقىت ىشىندە جانكۇيەرلەر الەمنىڭ ۇزدىك قۇرامالارى اراسىنداعى تارتىستى ماتچتاردى تاماشالاپ، جاڭا چەمپيوننىڭ انىقتالۋىنا كۋا بولادى.
