قىرعىزستاننىڭ بۇرىنعى پرەمەر-ءمينيسترى دانيار ۇسەنوۆتىڭ ۇلى الماتىداعى №18 تەرگەۋ يزولياتورىندا قاماۋدا وتىر. ۋرمات ۇسەنوۆ، قىرعىزستاننىڭ ەكى ازاماتى جانە ءبىر قازاقستاندىق زاڭسىز كاسىپكەرلىك قىزمەتپەن اينالىسۋ جانە ترانسۇلتتىق ۇيىمداسقان قىلمىستىق توپ قۇرۋ ءىسى بويىنشا كۇدىكتى رەتىندە تانىلعان. بۇل تۋرالى Kaktus.media جازدى، دەپ حابارلايدى «ادىرنا» ءتىلشىسى.
ولارعا قازاقستان قىلمىستىق كودەكسىنىڭ 28-بابىنىڭ 3-بولىگى جانە 214-بابىنىڭ 2-بولىگى 1-تارماعى («قىلمىستىق توپ جاساعان زاڭسىز كاسىپكەرلىك قىزمەتتى ۇيىمداستىرۋ»), سونداي-اق 264-بابىنىڭ 1-بولىگى («ترانسۇلتتىق ۇيىمداسقان توپتى نەمەسە ترانسۇلتتىق قىلمىستىق ۇيىمدى قۇرۋ، وعان باسشىلىق ەتۋ نە ونىڭ قۇرىلىمدىق بولىمشەسىن باسقارۋ») بويىنشا ايىپ تاعىلعان.
تەرگەۋ دەرەگىنە سايكەس، كەلتىرىلگەن شىعىن كولەمى 26 ميلليون تەڭگەنى قۇرايدى.
«سونىمەن قاتار تاركىلەنگەن كاليان تاباگىنىڭ قۇنى 46 ميلليون تەڭگەدەن اسادى. تەرگەۋ مالىمەتىنشە، تاركىلەنگەن ءونىمنىڭ جالپى كولەمى 1,6 توننادان كوپ. 10 ناۋرىزدا الماتى قالاسىنىڭ مامانداندىرىلعان اۋدانارالىق تەرگەۋ سوتى كۇدىكتىلەردى ەكى اي مەرزىمگە قاماۋدا ۇستاۋعا سانكتسيا بەردى»، – دەپ جازدى باسىلىم.
دانيار ۇسەنوۆ – 2009-2010 جىلدار ارالىعىندا قۇرمانبەك باكيەۆ پرەزيدەنت بولعاندا، قىرعىزستاننىڭ مينيسترلەر كابينەتىن باسقارعان ەدى. 2010 جىلعى جاپپاي نارازىلىق اكتسيالارىنىڭ رەۆوليۋتسياعا ۇلاسۋىنا بايلانىستى قىزمەتىنەن كەتۋ تۋرالى ءوتىنىش بەرگەن. باق مالىمەتىنشە، كەيىن ۇلىبريتانياعا كەتكەن. 2017 جىلدان بەرى بەلارۋس ەلىندە دانيل ۋريتسكي دەگەن اتپەن تۇرادى. قازىرگى ۋاقىتتا «بەلارۋس ۇلتتىق بيوتەحنولوگيالىق كورپوراتسياسىن» باسقارادى.
قىرعىزستاننىڭ باس پروكۋراتۋراسى ۇسەنوۆكە قاتىستى قىلمىستىق ءىس قوزعاعان. وعان بەيبىت تۇرعىنداردى جاپپاي اتۋ ارەكەتىن ۇيىمداستىردى دەگەن ايىپ تاعىلعان. قىرعىزستان سوتى ونى سىرتتاي 15 جىلعا باس بوستاندىعىنان ايىرعان.
