31 جاستاعى الپينيست، ايەلدەردىڭ ءبىلىم الۋ قۇقىعى ءۇشىن بەلسەندى تۇردە كۇرەسىپ جۇرگەن زاكيا احماد ەۆەرەست شىڭىن باعىندىرعان العاشقى اۋعان ايەلى اتاندى، دەپ حابارلايدى «ادىرنا» ءتىلشىسى.
ول الەمدەگى ەڭ بيىك شىڭعا 21 مامىر كۇنى تاڭەرتەڭ كوتەرىلگەن. احماد بۇعان دەيىن فرانتسياداعى مونبلان، ۇندىستانداعى ناندادەۆي شىڭدارىن جانە اۋعانستاننىڭ تەڭىز دەڭگەيىنەن 7402 مەتر بيىكتىكتەگى ەڭ بيىك شىڭى ناۋشاحتى دا باعىندىرعان.
الپينيست Rukhshana Media-عا بەرگەن سۇحباتىندا ءبىر جىل بويى ەۆەرەستكە شىعۋعا ۇزدىكسىز دايىندالعانىن ايتقان. سونىمەن قاتار ەكسپەديتسيا شىعىندارىنىڭ ءبىر بولىگىن جابۋ ءۇشىن GoFundMe پلاتفورماسىندا قاراجات جيناۋ ناۋقانىن باستاعان.
ايتا كەتەيىك، زاكيا احمادتىڭ بۇل جەتىستىگى اۋعانستاندا تاليبان بيلىگى ايەلدەردىڭ سپورتپەن اينالىسۋىنا تىيىم سالعان كەزەڭگە تۇسپا-تۇس كەلىپ وتىر.
زاكيا - اۋعانستانداعى حازارە قاۋىمىنان شىققان، قازىر اۋستراليادا تۇرادى. جاسى 31-دە.
