الماتى وبلىسى پوليتسيا دەپارتامەنتىنىڭ قىزمەتكەرى جاسۇلان نۇراسىلوۆ تۇنگى ۋاقىتتا بولعان ءورت كەزىندە باتىلدىق تانىتىپ، ادام ءومىرىن امان الىپ قالدى، دەپ حابارلايدى «ادىرنا» ءتىلشىسى Polisia.kz-كە سىلتەمە جاساپ.
وقيعا تۇنگى ساعات شامامەن 03:00-دە بولعان. پوليتسيا قىزمەتكەرى كورشى ءۇي اۋماعىنان شىققان ءورتتى بايقاپ قالعان. الدىن الا مالىمەتكە سايكەس، اۋەلى ءۇيدىڭ جاپسارلاس قۇرىلىسى ورتەنىپ، كەيىن جالىن جازعى اس ۇيگە تاراعان. سول ساتتە ىشىندە 90 جاستاعى اجەي بولعان. ارتىنشا ءورت تۇرعىن ءۇيدىڭ شاتىرىنا جايىلا باستاعان.
«جاعدايدىڭ كۇردەلىلىگىنە قاراماستان، جاسۇلان نۇراسىلوۆ ءبىر ءسات كىدىرمەستەن ارەكەت ەتكەن. ول قورشاۋدى بۇزىپ كىرىپ، قالىڭ ءتۇتىن باسقان جازعى اس ۇيدەن ۇيىقتاپ جاتقان قاريانى تاۋىپ، قاۋىپسىز جەرگە الىپ شىققان. كەيىن ۇيدەگى وزگە تۇرعىنداردى وياتىپ، ولاردىڭ دا دەر كەزىندە ەۆاكۋاتسيالانۋىنا كومەكتەسكەن. سونىمەن قاتار پوليتسەي ءورت تۋرالى شۇعىل قىزمەتتەرگە حابار بەرىپ، ءورت سوندىرۋشىلەر كەلگەنگە دەيىن جالىننىڭ تارالۋىنا جول بەرمەۋ ءۇشىن قولدان كەلگەن شارالاردى جاساعان»،–دەلىنگەن حابارلامادا.
وقيعا ورنىنا جەتكەن ءورت سوندىرۋشىلەر ءتىلسىز جاۋدى جەدەل سوندىرگەن. پوليتسەيدىڭ باتىل ءارى شاپشاڭ ارەكەتىنىڭ ارقاسىندا قايعىلى جاعدايدىڭ الدىن الىپ، ادام ءومىرىن ساقتاپ قالۋعا مۇمكىندىك تۋعان. كەيىن انىقتالعانداي، قۇتقارىلعان تۇرعىندار جاسۇلان نۇراسىلوۆتىڭ كورشىلەرى بولعان. وقيعادان كەيىن كوشە تۇرعىندارى مەن كۋاگەرلەر وعان العىس ءبىلدىرىپ، ەرلىگى مەن دەر كەزىندە كورسەتكەن كومەگى ءۇشىن ارنايى بەينەۇندەۋ جولداعان.
