فوتو: @abat.kuatov_ / Instagram
ماڭعىستاۋ وبلىسىندا سيرەك كەزدەسەتىن جولاقتى قورقاۋ قاسقىرعا ۇقساس جانۋاردىڭ سۋرەتى الەۋمەتتىك جەلىلەردە تارالىپ، كوپشىلىكتىڭ قىزىعۋشىلىعىن تۋدىردى. فوتونى ءوڭىر تۇرعىنى ابات قۋاتوۆ جاريالاعان. سۋرەتتە جانۋار كولىكتىڭ اشىق جۇكسالعىشىندا بايلاۋلى جاتقانى كورىنەدى، دەپ حابارلايدى “ادىرنا”.
مامانداردىڭ ايتۋىنشا، بۇل – جولاقتى قورقاۋ قاسقىر بولۋى ابدەن مۇمكىن. «ECO-SOCIAL» قوعامدىق بىرلەستىگىنىڭ اتقارۋشى ديرەكتورى، ەكولوگ ادىلبەك قوزىباقوۆتىڭ سوزىنشە، مۇنداي جانۋارلار ماڭعىستاۋ اۋماعىندا وتە سيرەك كەزدەسەدى.
«ماڭعىستاۋدا شىنىمەن بىرنەشە جۇپ قورقاۋ مەكەندەۋى مۇمكىن. مۇنى جان-جاقتى زەرتتەۋ كەرەك. زەرتتەۋ ناتيجەلەرى نەگىزىندە قورقاۋدى ماڭعىستاۋ وبلىسىنىڭ جانە جالپى قازاقستاننىڭ فاۋناسىنا ەنگىزىپ، قىزىل كىتاپقا قوسۋعا بولادى. سەبەبى، مەنىڭ بىلۋىمشە، ەلىمىزدىڭ باسقا ايماقتارىندا ول كەزدەسپەيدى»، - دەدى ادىلبەك قوزىباقوۆ.
ساراپشىنىڭ مالىمەتىنشە، بۇعان ۇقساس وقيعا شامامەن 15 جىل بۇرىن تىركەلگەن. سول كەزدە دە جەرگىلىكتى تۇرعىندار قورقاۋدى بايقاعان.
ماماندار وڭىردە دالالىق زەرتتەۋ جۇمىستارىن كۇشەيتىپ، جانۋارلار پوپۋلياتسياسىنا مونيتورينگ جۇرگىزۋ كەرەك دەپ ەسەپتەيدى.
جولاقتى قورقاۋ – نەگىزىنەن تاياۋ شىعىس، كاۆكاز، ورتالىق ازيا مەن ءۇندىستاننىڭ قۇرعاق ايماقتارىندا تىرشىلىك ەتەتىن سيرەك جىرتقىش اڭ. قازاقستان اۋماعىندا ول وتە سيرەك كەزدەسەدى.
