فوتو: بورت1
قازاقستان پرەزيدەنتى قاسىم-جومارت توقاەۆقا تيەسىلى ەرەكشە اقالتەكە جىلقىسىنىڭ بەينەلەرى شەتەلدىك بورتتىق باسىلىمداردا جارىق كوردى. بۇل تۋرالى Kazinform اگەنتتىگى جازدى، دەپ حابارلايدى “ادىرنا”.
2026 جىلعى مامىر ايىندا رەسەيدىڭ «روسسيا» اۋە كومپانياسىنىڭ بورتتىق جۋرنالىندا «ۇلى دالانىڭ اسپان تۇلپارى» اتتى ماقالا جاريالاندى. وندا قازاقستان پرەزيدەنتىنە سىيعا تارتىلعان اقالتەكە تۇقىمدى بيە تۋرالى باياندالادى. اقجان دەگەن اتاۋدى وعان مەملەكەت باسشىسىنىڭ ءوزى بەرگەن.
وسىعان ۇقساس «دالا قاناتتارى» جايلى اسەرلى ماقالا قىتايدىڭ «Wings of China» بورتتىق جۋرنالىندا دا جارىق كوردى.
فوتو: kazinform
سوڭعى جىلدارى قازاقستاننىڭ سيمۆولدارى شەتەلدىك باسىلىمداردىڭ نازارىن ءجيى اۋدارىپ كەلەدى. مۇنداي ماقالالاردىڭ حالىقارالىق اۋە كومپانيالارىنىڭ بورتتىق جۋرنالدارىندا جاريالانۋى قازاقستاندىق مادەني ديپلوماتيانى ناسيحاتتاۋعا ىقپال ەتەدى. بورتتىق ءباسپاسوز ىسكەر ادامدار مەن تۋريستەردەن تۇراتىن كەڭ اۋديتوريانى قامتىپ، جولاۋشىلارعا ۇشۋ بارىسىندا قازاقستانمەن تانىسۋعا مۇمكىندىك بەرەدى.
بۇگىندە تانىمال بولا باستاعان اقجان بەينەسى تەك شەتەلدە عانا ەمەس، قازاقستاندى حالىقارالىق اۋە تاسىمالى نارىعىندا تانىستىراتىن باسىلىمداردا دا سۇرانىسقا يە. ماسەلەن، ول تۋرالى ماقالانى Air Astana اۋە كومپانياسىنىڭ Tengri جۋرنالىنان دا كەزدەستىرۋگە بولادى. بۇل جۋرنالدىڭ تارالۋ ەرەكشەلىگىن ەسكەرسەك، قازاق تۇلپارىنىڭ تاريحىمەن ەڭ الدىمەن حالىقارالىق باعىتتاردا ۇشاتىن جولاۋشىلار تانىسادى.
جاريالانىمداردىڭ باستى كەيىپكەرى اقجان — تازا قاندى اقالتەكە تۇقىمىنىڭ وكىلى. ماقالا اۆتورلارى اقىلدى ءارى ايبىندى جىلقىنىڭ قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ سۇيىكتى تۇلپارى ەكەنىن ەرەكشە اتاپ وتەدى. شەتەلدىك جۋرنالدار اقجاننىڭ بىرەگەي بولمىسىن سۇيسىنە سيپاتتايدى. ول — تازا قاندى اقالتەكەلەر گاناتلى مەن تابىستىڭ ءتولى. جىلقىنىڭ ەسىمى قازاق تىلىنەن اۋدارعاندا «تازا جان» دەگەن ماعىنانى بىلدىرەدى.
ماقالالاردا ونىڭ سيرەك تۇسىنە دە ايرىقشا نازار اۋدارىلعان. اقجان يزابەللا (كرەم تۇستەس) ماستكە جاتادى. مۇنداي ءتۇس الەمدەگى اقالتەكە جىلقىلارىنىڭ نەبارى 3 پايىزىندا عانا كەزدەسەدى.
“ونىڭ ءجۇنى ەرەكشە وپتيكالىق اسەرگە يە: جىڭىشكە تالشىقتارى جارىقتى شاعىلىستىرىپ، اتلاس سەكىلدى، ءتىپتى تىلسىم جارقىل بەرەدى”، — دەپ جازىلعان جاريالانىمدا.
اۆتورلار دالا مادەنيەتىندە يزابەللا ءتۇستى تۇلپار ەجەلدەن جاقسىلىقتىڭ، باق پەن بەرەكەنىڭ نىشانى سانالعانىن دا اتاپ وتەدى.
