وڭتۇستىك كورەيا مەن فرانتسيا ورمۇز بۇعازى ارقىلى كەمەلەردىڭ قاۋىپسىز ءوتۋىن قامتاماسىز ەتۋ ماقساتىندا بىرلەسكەن شارالاردى كۇشەيتۋگە كەلىستى، دەپ حابارلايدى "ادىرنا" ۇلتتىق پورتالى Yonhap News Agency-گە سىلتەپ.
كەلىسىم لي چجە ميون مەن ەممانۋەل ماكرون اراسىنداعى سەۋلدەگى كەزدەسۋ بارىسىندا جاسالدى. تاراپتار تەڭىز باعىتتارىنداعى قاۋىپسىزدىكتى قامتاماسىز ەتۋ، مۇناي مەن گاز جەتكىزىلىمدەرىنىڭ تۇراقتىلىعىن ساقتاۋ، ەنەرگەتيكا، جوعارى تەحنولوگيالار جانە حالىقارالىق ساۋدا سالالارىنداعى ىنتىماقتاستىقتى كەڭەيتۋ ماسەلەلەرىن تالقىلادى. كەزدەسۋ بارىسىندا مەملەكەت باسشىلارى ورمۋز بۇعازى ارقىلى وتەتىن تەڭىز جولدارىنىڭ قاۋىپسىزدىگىن ارتتىرۋ جانە الەمدىك ەكونوميكا ءۇشىن تاۋەكەلدەردى ازايتۋ باعىتىندا ءىس-قيمىلدى ۇيلەستىرۋگە ۋاعدالاستى. سونىمەن قاتار، ايماقتاعى گەوساياسي شيەلەنىستى باسەڭدەتۋ جانە ەنەرگيا رەسۋرستارىنىڭ جەتكىزىلۋىندەگى ىركىلىستەردىڭ الدىن الۋ ءۇشىن حالىقارالىق قاۋىمداستىقپەن بىرلەسىپ جۇمىس ىستەۋگە دايىن ەكەندەرىن جەتكىزدى.
قاۋىپسىزدىك ماسەلەلەرىمەن قاتار، تاراپتار ەنەرگەتيكا سالاسىنداعى، ونىڭ ىشىندە اتوم جانە وفشورلىق جەل ەنەرگەتيكاسى جوبالارى بويىنشا ىنتىماقتاستىقتى دامىتۋعا ەرەكشە نازار اۋداردى. بۇدان بولەك، جاساندى ينتەللەكت، جارتىلاي وتكىزگىشتەر، كۆانتتىق تەحنولوگيالار جانە عارىش يندۋسترياسى باعىتتارىنداعى ارىپتەستىكتى كەڭەيتۋ جوسپارلانىپ وتىر. ساۋدا-ەكونوميكالىق بايلانىستاردى دامىتۋ دا كەلىسسوزدەردىڭ ماڭىزدى بولىگى بولدى. كوشباسشىلار 2030 جىلعا قاراي ەكىجاقتى ساۋدا كولەمىن 20 ميلليارد دوللارعا دەيىن جەتكىزۋ ماقساتىندا ينۆەستيتسيالىق جانە ساۋدا قاتىناستارىن كۇشەيتۋگە كەلىستى.
ساپار اياسىندا ماڭىزدى مينەرالداردى جەتكىزۋ تىزبەگى مەن بىرلەسكەن ەنەرگەتيكالىق جوبالاردى ىسكە اسىرۋعا قاتىستى بىرقاتار قۇجاتتارعا قول قويىلدى. ايتا كەتەيىك، بۇل فرانتسيا پرەزيدەنتىنىڭ وڭتۇستىك كورەياعا سوڭعى 11 جىلداعى العاشقى رەسمي ساپارى بولىپ تابىلادى. سونداي-اق، ەكى ەل اراسىنداعى ديپلوماتيالىق قاتىناستاردىڭ 140 جىلدىعىنا وراي ۇيىمداستىرىلدى.
