كينەماتوگرافيا سالاسىنداعى ەڭ بەدەلدى ماراپاتتاردىڭ ءبىرى – «وسكار» سىيلىعى جاڭا ەرەجەلەر ەنگىزىپ، كينويندۋسترياداعى تالاپتاردى كۇشەيتتى. كينەماتوگرافيالىق ونەر جانە عىلىم اكادەمياسى قابىلداعان وزگەرىستەر تەحنولوگيالاردىڭ دامۋىنا جانە گولليۆۋدتاعى شىعارماشىلىق مامانداردىڭ تالاپتارىنا بايلانىستى جۇزەگە استى.
جاڭارتىلعان تالاپتارعا سايكەس، نەيروجەلى نەمەسە جاساندى ينتەللەكت كومەگىمەن جاسالعان جوبالار ەندى ماراپاتقا ۇمىتكەر بولا المايدى. اكادەميا كەز كەلگەن ءفيلمنىڭ «ادام قولىمەن جاسالعانىن» دالەلدەۋدى مىندەتتەيدى. بۇل تالاپ ستسەناريدەن باستاپ، اكتەرلىك ويىن مەن ۆيزۋالدى شەشىمدەرگە دەيىنگى بارلىق كەزەڭدى قامتيدى.
سونىمەن قاتار، ۇيىمداستىرۋشىلار قاجەت بولعان جاعدايدا ءفيلمنىڭ وندىرىسىنە قاتىستى تولىق تەحنيكالىق قۇجاتتاردى سۇراتۋعا قۇقىلى. بۇل قادام كينووندىرىستەگى اشىقتىقتى ارتتىرۋعا باعىتتالعان.
جاڭا ەرەجەلەر اكتەرلىك جانە ستسەناريلىك جۇمىستارعا دا اسەر ەتتى.
ەندى:
- اكتەرلىك نوميناتسيالار تەك ءتىرى اكتەرلەرگە عانا بەرىلەدى;
- جاساندى ينتەللەكت ارقىلى جازىلعان ستسەناريلەر كونكۋرسقا قابىلدانبايدى;
- قايتىس بولعان اكتەرلەردىڭ تسيفرلىق بەينەسىن قولدانۋعا شەكتەۋ قويىلادى.
بۇل وزگەرىستەر ادام ەڭبەگىن قورعاۋعا جانە شىعارماشىلىق ماماندىقتاردىڭ قۇندىلىعىن ساقتاۋعا باعىتتالعان.
ماڭىزدى جاڭالىقتاردىڭ ءبىرى – اكتەرلەرگە قاتىستى شەكتەۋدىڭ الىنىپ تاستالۋى. بۇرىن ءبىر اكتەر تەك ءبىر ءرولى ءۇشىن عانا ۇسىنىلسا، ەندى بىرنەشە فيلمدەگى رولدەرىمەن قاتار ۇمىتكەر بولا الادى. بۇل شەشىم ارتىستەردىڭ ەڭبەگىن جان-جاقتى باعالاۋعا مۇمكىندىك بەرەدى.
اكادەميا حالىقارالىق فيلمدەرگە قاتىستى ساياساتتى دا قايتا قارادى. بۇرىن ءار ەل تەك ءبىر فيلم ۇسىنسا، ەندى بۇل شەكتەۋ جويىلدى. فەستيۆالدەردە جوعارى ماراپات العان فيلمدەر «وسكارعا» تىكەلەي قاتىسا الادى.
سونىمەن قاتار، «ۇزدىك حالىقارالىق فيلم» نوميناتسياسىندا جۇلدە ەندى ەلگە ەمەس، رەجيسسەرگە تابىستالادى.
جاڭا ەرەجەلەر كينويندۋسترياداعى اشىقتىقتى ارتتىرىپ، ادام ەڭبەگىنىڭ ماڭىزىن قايتا العا شىعارۋدى كوزدەيدى. ساراپشىلاردىڭ پىكىرىنشە، بۇل وزگەرىستەر «وسكار» سىيلىعىنىڭ بەدەلىن ساقتاپ قانا قويماي، ونى جاڭا داۋىرگە بەيىمدەيدى.
