وپەك+ قۇرامىنا كىرەتىن جەتى ەل مۇناي ءوندىرۋ كولەمىنە قاتىستى جاڭا شەشىم قابىلدادى. بۇل تۋرالى اليانستىڭ رەسمي مالىمدەمەسىندە جاريالاندى، دەپ حابارلايدى “ادىرنا”.
3 مامىر كۇنى وپەك+ اياسىندا ساۋد ارابياسى، رەسەي، يراك، كۋۆەيت، قازاقستان، الجير جانە ومان وكىلدەرى ۆيرتۋالدى فورماتتا كەزدەسۋ وتكىزدى. جيىندا الەمدىك مۇناي نارىعىنىڭ قازىرگى احۋالى مەن الداعى دامۋ ۇردىستەرى تالقىلاندى.
كەزدەسۋ قورىتىندىسى بويىنشا اتالعان ەلدەر نارىق تۇراقتىلىعىن ساقتاۋ ماقساتىندا مۇناي ءوندىرۋ كولەمىن تاۋلىگىنە شامامەن 188 مىڭ باررەلگە ارتتىرۋعا كەلىستى. بۇل وزگەرىس 2026 جىلدىڭ ماۋسىم ايىنان باستاپ كۇشىنە ەنەدى.
سونىمەن قاتار قاتىسۋشى مەملەكەتتەر نارىقتاعى جاعدايدى تۇراقتى تۇردە باقىلاپ، قاجەت بولعان جاعدايدا قابىلدانعان شەشىمدەردى قايتا قاراۋعا دايىن ەكەنىن جەتكىزدى. ياعني، ولار ءوندىرىستى ۇلعايتۋ نەمەسە شەكتەۋ شارالارىن جەدەل وزگەرتىپ، ءتىپتى تولىقتاي كەرى قايتارۋ مۇمكىندىگىن دە ساقتاپ وتىر.
ەلدەر سونداي-اق بۇرىن قابىلدانعان مىندەتتەمەلەرگە ادال ەكەنىن راستادى. ونىڭ ىشىندە ءوندىرىس كولەمىن رەتتەۋ، ارتىق وندىرىلگەن مۇنايدى وتەۋ جانە بىرلەسكەن مينيسترلىك مونيتورينگ كوميتەتى باقىلاۋىنداعى كەلىسىمدەردى ساقتاۋ ماسەلەلەرى بار.
الداعى ۋاقىتتا بۇل جەتى مەملەكەت اي سايىن كەزدەسىپ، نارىقتاعى وزگەرىستەردى جانە ءوز مىندەتتەمەلەرىنىڭ ورىندالۋىن تالقىلاپ وتىرماق. كەلەسى كەزدەسۋ 2026 جىلعى 7 ماۋسىمعا جوسپارلانعان.
ايتا كەتەيىك، بۇعان دەيىن بىرىككەن اراب امىرلىكتەرى 2026 جىلدىڭ 1 مامىرىنان باستاپ وپەك پەن وپەك+ قۇرامىنان شىعاتىنىن مالىمدەگەن بولاتىن.
