قۇرىلىس كومپانياسىنىڭ باسشىسى ءمولدىر ءسۇيىنشالى ۇستالدى، دەپ حابارلايدى "ادىرنا" ۇلتتىق پورتالى.
قارجىلىق مونيتورينگ اگەنتتىگى استانا قالاسى بويىنشا دەپارتامەنتى اسا ءىرى كولەمدەگى الاياقتىق دەرەگى بويىنشا بىرنەشە قۇرىلىس كومپانياسىنىڭ باسشىسى ءمولدىر سۇيىنشالىگە قاتىستى تەرگەۋ جۇرگىزىپ جاتىر.
اگەنتتىك مالىمەتىنشە، 2021–2024 جىلدار ارالىعىندا كۇدىكتى Nura Elite كوتتەدج قالاشىعىن سالۋ سىلتاۋىمەن ازاماتتاردان قاراجات تارتقان. جوبا بويىنشا 37 كوتتەدج جانە 24 تاۋنحاۋس سالۋ جوسپارلانعانىمەن، تاۋنحاۋستار تولىق اياقتالماعان، تەك قاڭقالارى عانا تۇر. قۇرىلىس جۇمىستارىن 2023 جىلدىڭ ءتورتىنشى توقسانىنا دەيىن اياقتاۋ جونىندەگى مىندەتتەمەلەر ورىندالماعان.
تەرگەۋ دەرەكتەرىنە سايكەس، ساتىپ الۋشىلارمەن الدىن الا ساتىپ الۋ-ساتۋ شارتتارى جاسالعان. ناتيجەسىندە 56 ادام جابىرلەنۋشى دەپ تانىلىپ، كەلتىرىلگەن شىعىن كولەمى 3,9 ملرد تەڭگەنى قۇراعان. ونىڭ ىشىندە 322 ملن تەڭگە كۇدىكتىنىڭ، سونداي-اق ونىڭ جۇبايى مەن اناسىنىڭ ەسەپشوتتارىنا اۋدارىلعان، ال 145 ملن تەڭگە قولما-قول اقشاعا اينالدىرىلعان.
سونىمەن قاتار، ءبىر جىلجىمايتىن مۇلىكتى بىرنەشە رەت ساتۋ فاكتىلەرى دە انىقتالعان.
قازىرگى ۋاقىتتا ءىس بويىنشا تەرگەۋ امالدارى جالعاسۋدا.
اشىق دەرەككوزدەرگە سۇيەنسەك، ءمولدىر ءسۇيىنشالى MM Group كومپانياسىنىڭ نەگىزىن قالاۋشى بولىپ تابىلادى. 2021 جىلى ول جاس كاسىپكەر رەتىندە Forbes Kazakhstan جۋرنالىنىڭ “30 جاسقا دەيىنگى 30” رەيتينگىنە ەنگەن. ول كەزدە جاسى 26-دا بولعان.
