قىرعىزستاندا ەكس-شەنەۋنىكتىڭ قىزمەتتەن كەتۋى توڭىرەگىندە ساياسي پىكىرتالاس كۇشەيدى، دەپ حابارلايدى "ادىرنا" ۇلتتىق پورتالى Topnews.kg-عا سىلتەپ.
قىرعىز رەسپۋبليكاسى پارلامەنتىنىڭ دەپۋتاتى ەلۆيرا سۋرابالديەۆا قازاقستاندىق جۋرناليست نۇرسەيىت جىلقىشىبايعا بەرگەن سۇحباتىندا قامشىبەك تاشيەۆتىڭ قىزمەتتەن بوساتىلۋىنا ىقتيمال مەملەكەتتىك توڭكەرىس ارەكەتى سەبەپ بولۋى مۇمكىن ەكەنىن مالىمدەدى.
ونىڭ ايتۋىنشا، ەل پرەزيدەنتى سادىر جاپاروۆ جاعدايدىڭ كۇردەلىلىگىنە قاراماستان قاتاڭ شارالارعا بارماي، تەك قىزمەتتەن بوساتۋمەن شەكتەلگەن. دەپۋتات پرەزيدەنتكە بۇل شەشىمدى قابىلداۋ وڭاي بولماعانىن، ويتكەنى تاشيەۆپەن ۇزاق جىلدىق قارىم-قاتىناسى بولعانىن اتاپ ءوتتى.
سۋرابالديەۆانىڭ سوزىنشە، بۇل جاعداي ءبىر كۇندە تۋىنداماعان، الدىن الا دايىندىق جۇرگەن. قازىر وقيعاعا بايلانىستى تەرگەۋ امالدارى جالعاسىپ جاتىر، كەيبىر كۇدىكتىلەر ۇستالىپ، ءىس اياسىندا جاۋاپقا تارتىلۋدا.
ايتا كەتەيىك، تاشيەۆتىڭ اقپان ايىندا وتستاۆكاسى تۋرالى حابارلانعان. ول ەلدىڭ ۇلتتىق قاۋىپسىزدىك مەملەكەتتىك كوميتەتىنىڭ توراعاسى جانە مينيسترلەر كابينەتىنىڭ توراعا ورىنباسارى قىزمەتتەرىن قاتار اتقارعان.
