تەمىرتاۋ قالاسىندا بالانى ۇرعان تاربيەشىگە قاتىستى ءىس قوزعالدى، دەپ حابارلايدى "ادىرنا" ۇلتتىق پورتالى.
بالاباقشا تاربيەشىسىنىڭ كىشكەنتاي قىزدى بەتىنەن ۇرعانى بەينەباقىلاۋ كامەراسىنا ءتۇسىپ، الەۋمەتتىك جەلىدە كەڭ تاراعان. وقيعا قوعام تاراپىنان قىزۋ تالقىلانىپ، تۇرعىنداردىڭ نارازىلىعىن تۋعىزدى.
بەلگىلى بولعانداي، وقيعا «ايگولەك» بالاباقشاسىندا بولعان. 36 جاستاعى تاربيەشى پوليتسيا بولىمشەسىنە جەتكىزىلىپ، ءمان-جاي انىقتالۋدا. سونىمەن قاتار، بالانىڭ اناسى دا قۇقىق قورعاۋ ورگاندارىنا شاقىرىلعان.
پوليتسيا مالىمەتىنشە، اناسى ارىز جازۋدان باس تارتقانىمەن، بۇل دەرەك بويىنشا قىلمىستىق ءىس تىركەلگەن. ءىس كامەلەتكە تولماعان بالانى تاربيەلەۋ مىندەتتەرىن تيىسىنشە ورىنداماۋ جانە قاتىگەزدىكپەن قاراۋ فاكتىسى بويىنشا قوزعالدى.
قازىرگى ۋاقىتتا وقيعاعا قاتىستى تەرگەۋ امالدارى جۇرگىزىلۋدە.
