استانادا تۇرعىن ءۇي كەشەندەرىنىڭ بىرىندە جەدەلساتى ىشىندە مەديتسينالىق بەتپەردە كيگەن ءجاسوسپىرىم بەس جاسار بالاعا پىشاق جاراقاتىن سالعان وقيعا قازاقستاندىقتاردى ءدۇر سىلكىندىردى، دەپ حابارلايدى “ادىرنا” ۇلتتىق پورتالى.
زارداپ شەككەن ءبۇلدىرشىن №2 كوپسالالى قالالىق بالالار اۋرۋحاناسىنىڭ جاق-بەت حيرۋرگياسى بولىمشەسىنە جاتقىزىلىپ، وعان شۇعىل وتا جاسالدى. دارىگەرلەردىڭ ايتۋىنشا، بالانىڭ بەتىنىڭ جۇمساق تىندەرىنە بىرنەشە كەسىك جاراقاتى سالىنعان.
“حيرۋرگتار قان كەتۋدى توقتاتۋ ءۇشىن تامىرلاردى تىكتى. قازىرگى تاڭدا ونىڭ جاعدايى ورتاشا تۇراقتى دەپ باعالانۋدا. بالا بەلسەندى، بارلىق قاجەتتى ەم-شارانى تولىق كولەمدە الۋدا،” – دەپ حابارلادى استانا قدب ءباسپاسوز قىزمەتى.
ەسكە سالساق، 11 اقپاندا ورىن العان وقيعاعا قاتىستى تەرگەۋ جۇرگىزىلۋدە. پوليتسەيلەر كۇدىكتىنىڭ پسيحونەۆرولوگيالىق ديسپانسەردە ەسەپتە تۇرعان كامەلەتكە تولماعان ءجاسوسپىرىم ەكەنىن انىقتادى. قۇزىرلى ورگاندار ءىستىڭ ءمان-جايىن تەكسەرىپ جاتىر.
