قحر ينۆەستورلارى تاراز قالاسىندا سۋ رەسۋرستارى مەن يرريگاتسيا جۇيەلەرىن باسقارۋعا ارنالعان سمارت-تەحنولوگيالار شىعاراتىن زاۋىت اشادى. سۋ رەسۋرستارى جانە يرريگاتسيا مينيسترلىگى مەن قىتايلىق كومپانيالار كونسورتسيۋمى ىنتىماقتاستىق تۋرالى مەموراندۋمعا قول قويدى، دەپ حابارلايدى «ادىرنا» ءتىلشىسى.
قۇجاتقا سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ پەن Yellow River Engineering Consulting Co. Ltd كومپانياسىنىڭ ديرەكتورى – باس ەكونوميسى ين دەۆەن قول قويدى. شەتەلدىك دەلەگاتسيا قۇرامىندا Leture Technology جانە Cheng Cheng Group كومپانيالارىنىڭ باسشىلارى دا بولدى.
كاسىپورىن تسيفرلىق شەشىمدەر وندىرۋگە ماماندانادى. اتاپ ايتقاندا، سۋ رەسۋرستارىن ءبولۋدى اۆتوماتتى تۇردە باقىلاۋ جانە باسقارۋ جۇيەلەرى، سۋ دەڭگەيى مەن ساپاسىن ولشەيتىن داتچيكتەر، يرريگاتسيا جەلىلەرىن ديسپەتچەرلەۋگە ارنالعان باعدارلامالىق-اپپاراتتىق كەشەندەر، سونداي-اق سۋ تاسقىنى مەن توتەنشە جاعدايلاردى ەرتە ەسكەرتۋ جۇيەلەرى شىعارىلادى.
زاۋىتتىڭ ىسكە قوسىلۋى قىتايدا قولدانىلاتىن وزىق تەحنولوگيالاردى جەرگىلىكتى جاعدايعا بەيىمدەۋگە، ءبىلىم مەن تاجىريبە ترانسفەرىن قامتاماسىز ەتۋگە جانە قازاقستاننىڭ سۋ شارۋاشىلىعى سالاسىنا زاماناۋي ستاندارتتاردى ەنگىزۋگە مۇمكىندىك بەرەدى. كاسىپورىن ء«وندىرىس – ءبىلىم – عىلىم» قاعيداتى بويىنشا جۇمىس ىستەيتىن ينتەگراتسيالانعان ورتالىقتىڭ ءبىر بولىگى بولادى دەپ كۇتىلىپ وتىر. مۇندا جابدىق وندىرۋمەن قاتار، ماماندار دايارلاۋ، كادرلاردىڭ بىلىكتىلىگىن ارتتىرۋ جانە تسيفرلىق شەشىمدەردى ەلىمىزدىڭ كليماتتىق جانە گيدرولوگيالىق جاعدايىنا بەيىمدەۋ جۇمىستارى جۇرگىزىلەدى. جوبانى جۇزەگە اسىرۋ يرريگاتسيا جۇيەلەرىنىڭ تيىمدىلىگىن ارتتىرۋعا، سۋ شىعىنىن ازايتۋعا جانە قازاقستاننىڭ سۋ قاۋىپسىزدىگىن نىعايتۋعا ىقپال ەتەدى.
ء«بىز بىرنەشە باعىت بويىنشا بىرلەسىپ جۇمىس ىستەۋگە كەلىستىك. ەڭ الدىمەن، اۆتوماتتاندىرۋ مەن تسيفرلاندىرۋدى مىندەتتى تۇردە ەنگىزە وتىرىپ، يرريگاتسيا جۇيەلەرىن رەكونسترۋكتسيالاۋ. ەكىنشىسى - كادر دايارلاۋ. سوڭعى ەكى جىلدا ءبىز قىتايلىق كاسىپورىندارمەن بەلسەندى ىنتىماقتاستىق ورناتتىق. مىسالى، بيىل Power China كومپانياسىنىڭ ەسەبىنەن سۋ شارۋاشىلىعى سالاسىنداعى 125 مامان قىتايدا بىلىكتىلىگىن ارتتىرۋ كۋرستارىنان ءوتتى»، - دەدى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ.
