Foto: gov.kz
Aqtöbe oblysynda bırneşe jyl būryn bolǧan qaiǧyly oqiǧa qoǧamda älı de şeşımın tappai kele jatqan mäselenı qaita kün tärtıbıne şyǧardy. Qaŋǧybas itterdıŋ şabuylynan 13 jastaǧy bala köz jūmdy. Balanyŋ äkesı Otarbek Äbşanov oqiǧanyŋ qalai bolǧanyn aityp, jauapkerşılık mäselesın köterdı.
«Balam oiynǧa şyǧyp ketken…»
Otarbek Äbşanovtyŋ aituynşa, qaiǧyly kün ädettegıdei bastalǧan. Ol jūmysta bolǧan kezde balasy syrtqa oinauǧa şyqqan.
«Oqiǧa bolǧan künı men jūmysta boldym. Balam oiynǧa şyǧyp ketken. Bır kezde mektepten WhatsApp arqyly habarlama keldı. Balalarǧa eskertu jasap jatyr eken, bır balaǧa itter şabuyl jasaǧany turaly habarlama boldy. Sol kezde män bermedım…», - deidı ol.
Alaida köp ūzamai jaǧdaidyŋ auyr ekenı belgılı bolady.
«Keiın polisiia keldı. Bızge videony körsettı. Sol kezde ǧana bärın tüsındık», - dep aitty aqtöbelık tūrǧyn.
Äkenıŋ sözınşe, oqiǧa qaladaǧy yqşamaudandardyŋ bırınde bolǧan. Balasyna şabuyl jasaǧan itterdıŋ äreketı belgılı bır sebeppen bastalǧan boluy mümkın.
«Videoda aldymen bır qara it bolǧan. Aituynşa, ol jaŋa küşıktegen it eken. Küşıkterın qyzǧanyp, aldymen sol şabuyl jasaǧan siiaqty», - dedı ol.
Oqiǧa barysynda jaǧdai uşyǧyp ketken.
«Basynda bır it bolsa, keiın oǧan taǧy 3-4 it qosylyp, top bolyp ketken. Sol kezde balam qaşyp qūtyla almai qalǧan», - dep tüsındırdı aqtöbelık tūrǧyn oqiǧany.
Oqiǧa bırneşe sekundtyŋ ışınde qaiǧyly aiaqtalǧan.
«İtter jinalyp, talap tastaǧan. Sol jerde auyr jaraqat alyp, jan tapsyrdy», - dep qaiǧyly kündı esıne aldy.
Otarbek Äbşanov mūndai oqiǧalar älı de jalǧasyp jatqanyn aitady.
«Menıŋ balamnan keiın de osyndai jaǧdailardy estıp jürmın. Bır er adam balasyn köterıp tūrǧan kezde itter şabuyl jasaǧan. Taǧy bır 7 jasar balaǧa şabuyl bolǧan. Bır qyz bala itterge talanǧannan keiın psihologiialyq soqqy alyp, eşkımmen söilespei qalǧan», - dep körgen-estıgen oqiǧalaryn bölıstı Otarbek Äbşanov.
Onyŋ aituynşa, būl – jüielı problema. Mäselenıŋ tüp-törkını – baqylaudyŋ älsızdıgı men jauapkerşılıktıŋ joqtyǧynda.
«Men naqty ne ısteu kerek ekenın bılmeimın. Bıraq adam qauıpsızdıgı bırınşı orynda boluy kerek. Eŋ basty qūndylyq – adamnyŋ ömırı men densaulyǧy», - dedı ol.
Sondai-aq ol üi januarlaryn asyrauşylarǧa talapty küşeitu qajet ekenın atap öttı.
«Eger bıreu it ūstasa, oǧan tolyq jauap beruı kerek. Jai ǧana asyrap, keiın qarausyz qaldyruǧa bolmaidy. Eger ol ainalaǧa qauıp töndırse, būl dūrys emes», - deidı otandasymyz.
Aqtöbedegı ahual: özgerıs bar ma?
Äbşanovtyŋ aituynşa, öŋırde qaŋǧybas itter mäselesı būrynnan bar.
«Men būl problemany būrynnan sezetınmın. Bır künı ülken jaǧdai bolady dep oilaitynmyn. İtter toptasyp jüredı, bıraq naqty baqylau joq», - dedı ol.
Qazırgı jaǧdaiǧa qatysty da tübegeilı özgerıs baiqalmaidy.
«Qazır de tolyq şeşıldı dep aita almaimyn. Älı de adamdar zardap şegıp jatyr», - deidı keiıpkerımız.
Aita keteiık, qazır Qazaqstanda januarlarǧa jauapkerşılıkpen qarau mäselesı qaita talqylanyp jatyr. Mäjılıste būralqy itterdı retteu, sonyŋ ışınde iesız januarlardy uaqytşa oqşaulau jäne qajet bolǧan jaǧdaida evtanaziia qoldanu turaly ūsynystar aityldy
