استانانىڭ قىلمىستىق ىستەر جونىندەگى اۋدانارالىق سوتى مەديتسينا قىزمەتكەرىنە قاتىستى كۇش قولدانۋ فاكتىسى بويىنشا ۇكىم شىعاردى، دەپ حابارلايدى «ادىرنا» ءتىلشىسى.
وقيعا 13 ناۋرىزدا بولعان. ەر ادام ماس كۇيىندە ساۋدا ءۇيىنىڭ اۆتوتۇراق اۋماعىندا جەدەل جاردەم بريگاداسىنىڭ كورسەتكەن مەديتسينالىق كومەگىنە كوڭىلى تولماي، مەديتسينا قىزمەتكەرىنە كۇش قولدانعان.
ء«وز ارەكەتىمەن ول فەلدشەرگە دەنساۋلىققا زيان كەلتىرمەگەنىمەن، فيزيكالىق اۋىرسىنۋ تۋعىزعان. سونداي-اق مەديتسينا قىزمەتكەرىنىڭ قاۋىپسىز جۇمىس ىستەۋگە زاڭمەن كەپىلدىك بەرىلگەن قۇقىعى مەن جەكە باسىنا قول سۇعىلماۋشىلىق قاعيداسىن ورەسكەل بۇزعان»،-دەلىنگەن ءىس ماتەريالدارىندا.
پروكۋرور ايىپتالۋشىعا قر قك 380-3-بابى 3-بولىگى بويىنشا 1 جىل 6 اي باس بوستاندىعىنان ايىرۋ جازاسىن تاعايىنداۋدى سۇرادى. ايىپتالۋشى كىناسىن مويىنداپ، ءوزىن باس بوستاندىعىنان ايىرماۋدى ءوتىندى. جابىرلەنۋشى قاتاڭ جازا تاعايىنداۋدى سۇرادى.
ايىپتالۋشى بۇرىن سوتتالماعان. الايدا ول بىرنەشە رەت تىنىشتىقتى بۇزعانى جانە قوعامدىق ورىندا الكوگولدىك ىشىمدىك ىشكەنى ءۇشىن اكىمشىلىك جاۋاپكەرشىلىككە تارتىلعان.
ءىس بويىنشا جەدەلدەتىلگەن سوتقا دەيىنگى تەرگەۋ جۇرگىزىلدى. قر قك 55-بابى 3-بولىگىنە سايكەس سوت ەڭ جوعارى جازا مەرزىمىنىڭ جارتىسىنان ارتىق جازا تاعايىنداي المادى.
جاسالعان قىلمىستىڭ سيپاتى مەن قوعامدىق قاۋىپتىلىك دارەجەسىن، ايىپتالۋشىنىڭ جەكە باسىن، جابىرلەنۋشىنىڭ پىكىرىن جانە انىقتالعان ءمان-جايلاردىڭ جيىنتىعىن ەسكەرە وتىرىپ، سوت ايىپتالۋشىنى قىلمىستىق-اتقارۋ جۇيەسىنىڭ ەڭ تومەنگى قاۋىپسىزدىك مەكەمەسىندە وتەۋمەن 1 جىل 6 اي باس بوستاندىعىنان ايىرۋ جازاسىنا كەستى.
