22–24 сәуірде Астанада Аймақтық экологиялық саммит аясында Каспий теңізінің деңгейінің төмендеу себептерін зерттейтін бірлескен жұмыс тобының алғашқы отырысы ұйымдастырылады, деп хабарлайды “Адырна”.
Бакудегі Қазақстан елшілігінің басшысы Алим Байел мен Әзербайжан президентінің климат мәселелері жөніндегі өкілі Мұхтар Бабаев кездесіп, Каспий теңізінің экологиялық жағдайын жақсарту мәселелерін талқылаған.
Кездесу барысында Әзербайжан Қазақстан президенті Қасым-Жомарт Тоқаевтың БҰҰ жүйесі аясында халықаралық су ұйымын құру бастамасын қолдайтыны атап өтілді.
Мұхтар Бабаев Әзербайжанның бастаманы толық қолдайтынын, бұл ұйымның құрылуы су ресурстарын басқарудағы қазіргі проблемаларды шешуде өзекті екенін жеткізді. Ол атап өткендей, су мәселелері тек экологиялық сипатқа ие емес, сонымен қатар қауіпсіздік пен экономикаға да тікелей әсер етеді, сондықтан оларды жүйелі түрде шешу маңызды.
Кездесу барысында тараптар экологиялық күн тәртібі, Каспий теңізінің экожүйесін сақтау, алдағы бірлескен іс-шараларға дайындық және халықаралық табиғатты қорғау бастамаларын қолдау мәселелерін талқылады.
Сонымен қатар, Қазақстан елшісі Әзербайжан тарапын Аймақтық экологиялық саммитке белсенді қатысуға шақырды. Саммит барысында бірлескен жұмыс тобының алғашқы отырысы өткізіліп, Каспий теңізінің деңгейін төмендету себептері жан-жақты қаралады деп жоспарлануда.
