بەلارۋس پرەزيدەنتى الەكساندر لۋكاشەنكو پحەنيانعا ساپارى بارىسىندا كحدر كوشباسشىسى كيم چەن ىنعا اۆتومات سىيعا تارتتى. بۇل تۋرالى «پۋل پەرۆوگو» Telegram-ارناسى جازدى، دەپ حابارلايدى «ادىرنا» ءتىلشىسى.
«دۇشپاندار پايدا بولىپ جاتسا، كەرەك بولىپ قالار»،-دەپ ازىلدەدى لۋكاشەنكو قارۋدى تابىستاۋ كەزىندە.
بەلارۋس باسشىسى ەلدە اتىس قارۋى مەن وق-ءدارىسىن ءوندىرۋ جولعا قويىلعانىن اتاپ ءوتتى. جەلىدە جاريالانعان ۆيدەودان كحدر كوشباسشىسىنا سىيلىقتىڭ ۇناعانى بايقالادى. ول اۆتوماتتى بىردەن قولىنا الىپ، مۇقيات قاراپ شىقتى.
سونداي-اق لۋكاشەنكو كيم چەن ىنعا بەلارۋس ونىمدەرىن سىيلادى. ءوز كەزەگىندە كحدر كوشباسشىسى قىلىش، ۇلكەن ۆازا جانە ونىڭ ساپارىنا ارنايى دايىندالعان ەستەلىك التىن تيىن تارتۋ ەتتى.
لۋكاشەنكو كحدر-عا رەسمي ساپارمەن 25 ناۋرىزدا كيم چەن ىننىڭ شاقىرۋىمەن كەلگەن. بەلارۋس باسشىسىنىڭ قۇرمەتىنە پحەنياندا سالتاناتتى ءراسىم ءوتتى. كيم ير سەن الاڭىنا مىڭداعان ادام جينالىپ، لۋكاشەنكونى قارسى الدى. ءراسىم بارىسىندا ەكى ەلدىڭ ءانۇرانى ورىندالىپ، وتشاشۋ اتىلدى. سالتاناتتى شاراعا اتتى اسكەر مەن قۇرمەت قاراۋىلى روتاسى قاتىستى.
ال بۇگىن، 26 ناۋرىزدا الەكساندر لۋكاشەنكو مەن كيم چەن ىن پحەنياندا رەسمي كەلىسسوزدەر وتكىزىپ، ەكى ەل اراسىنداعى قارىم-قاتىناستىڭ جاڭا كەزەڭى باستالعانىن مالىمدەدى. كەلىسسوزدەر قورىتىندىسى بويىنشا بەلارۋس پەن كحدر اراسىندا دوستىق جانە ىنتىماقتاستىق تۋرالى كەلىسىمگە قول قويىلدى. ودان بولەك، تاراپتار ءبىلىم بەرۋ، دەنساۋلىق ساقتاۋ، اۋىل شارۋاشىلىعى، مادەنيەت، دەنە شىنىقتىرۋ جانە سپورت، اقپارات سالاسى، سونداي-اق بەلارۋس ساۋدا-ونەركاسىپ پالاتاسى مەن سىرتقى ىستەر مينيسترلىكتەرى اراسىنداعى ءوزارا ءىس-قيمىلدى قامتيتىن ناقتى باعىتتار بويىنشا ونعا جۋىق كەلىسىم مەن مەموراندۋمدارعا قول قويدى.
