لوندوننىڭ سولتۇستىگىندە ەۆرەي قاۋىمىنا تيەسىلى ءتورت جەدەل جاردەم كولىگىن ورتەۋ وقيعاسى انتيسەميتتىك وشپەندىلىك نەگىزىندەگى قىلمىس رەتىندە تەرگەلىپ جاتىر، دەپ حابارلايدى "ادىرنا" ۇلتتىق پورتالى.
بۇل تۋرالى لوندون مەتروپوليتەن پوليتسياسى مالىمدەدى.
وقيعا 23 ناۋرىزعا قاراعان ءتۇنى گولدەرس-گرين اۋدانىنداعى حايفيلد-كورت كوشەسىندە بولعان. لوندون ءورت ءسوندىرۋ بريگاداسى شاقىرتۋ بويىنشا جەتكەن كەزدە ەۆرەي قاۋىمىنىڭ «Hatzalah» جەدەل قىزمەتىنە تيەسىلى ءتورت كولىكتىڭ جانىپ جاتقانىن انىقتاعان.
ءورت كەزىندە كولىكتەردەگى بىرنەشە گاز باللونى جارىلىپ، جاقىن ماڭداعى تۇرعىن ءۇيدىڭ تەرەزەلەرى سىنعان. ءتىلسىز جاۋ 03:06 شاماسىندا تولىق ءسوندىرىلدى. زارداپ شەككەندەر جوق.
قاۋىپسىزدىك ماقساتىندا جاقىن ماڭداعى تۇرعىندار ەۆاكۋاتسيالانىپ، اۋدان جولدارى ۋاقىتشا جابىلدى.
تەرگەۋ بارىسىندا پوليتسيا بەينەباقىلاۋ كامەرالارىنىڭ جازبالارىن تەكسەرىپ جاتىر. الدىن الا مالىمەت بويىنشا، ءۇش كۇدىكتى ىزدەستىرىلۋدە.
قۇقىق قورعاۋ ورگاندارى ءدىني قاۋىم وكىلدەرىمەن بايلانىس ورناتىپ، اۋداندا قوسىمشا پاترۋلدەۋ جۇمىستارىن كۇشەيتكەن.
