وسىدان ەكى جىل بۇرىن سوتتالعان ۆاينەر مەيىرجان تورەباەۆ جازاسىن وتەپ، وتباسىنا ورالدى. بۇل تۋرالى ول الەۋمەتتىك جەلىدەگى پاراقشاسىندا جاريالادى، دەپ حابارلايدى “ادىرنا”.
"سىرتقى بوستاندىعىمنان ايىرىلعان كەزدە، ىشكى بوستاندىعىمدى تاپتى. سولاي بولۋى كەرەك بولعان ەكەن. ءومىر ۇسىنعان ساباقتارىنان قاشا بەرسەك، باقىتتى ءومىر سۇرە الماس ەدىك. جانىڭ قالاعان تاجىريبەدەن قاشۋ مۇمكىن ەمەس. ماعان تىنىشتىق قاجەت ەدى، زۋلاعان ۋاقىتتان تىس، ەشقانداي ءرولسىز، وزىممەن ءوزىم قالىپ، كىم ەكەنىمدى ايقىنداۋ قاجەت ەدى. كەيدە جاڭا ءوزىڭدى جيناپ الۋ ءۇشىن سىنىپ قالۋ دا كەرەك ەكەن. بۇل ساباق ءۇشىن اللاعا راقمەت. بۇل قۇندى ساباق بولدى. جانىما ەرەكشە ساياحات بولدى", - دەپ جازدى ول.
ونىڭ جازباسىنا دوستارى مەن جەلىدەگى وقىرماندارى كوپتەگەن ىزگى تىلەكتەر مەن جىلى لەبىزدەرىن جازعان.
"بالام،امان-ەسەن وتباسىڭا ورالۋىڭمەن! جاقسى كۇندەرىڭ الدا بولسىن، وتباسىڭ امان، دەنىڭ ساۋ، جاقسىلىقتارىڭ كوپ بولسىن", "قايتا ورالۋىڭمەن، باۋىرىم", "ورتامىزعا قايتا ورالدىڭ", - دەپ جازدى جەلى قولدانۋششىلارى.
ەسكە سالساق، 2022 جىلدىڭ اقپان ايىندا بلوگەر مەيىرجان تورەباەۆ پەن اكتەر مەيىرحان شەرنيازوۆ Mudarabah Capital قارجى پيراميداسىن قۇردى دەگەن كۇدىككە ىلىنگەن بولاتىن.
2022 جىلدىڭ 20 ساۋىرىندە ولار 10 تاۋلىككە قاماۋعا الىنىپ، كەيىن قاماۋعا الۋ مەرزىمى ەكى ايعا ۇزارتىلعان.
وسىدان سوڭ قاماۋعا الۋ مەرزىمى تاعى بىرنەشە رەت ۇزارتىلدى. سوڭعى رەت كۇدىكتىلەردى قاماۋدا ۇستاۋ مەرزىمى 2022 جىلدىڭ 21 قاراشاسىندا وزگەرتىلدى.
2022 جىلدىڭ 12 جەلتوقسانىندا مەيىرجان تورەباەۆ پەن مەيىرحان شەرنيازوۆ ءىسى سوتقا جولدانعانى بەلگىلى بولدى.
ال 2022 جىلدىڭ 21 جەلتوقسانىندا سوت وتىرىسى باستالىپ، الدىن الا تىڭداۋدا ايىپتالۋشىلاردىڭ ادۆوكاتتارى بۇلتارتپاۋ شاراسىن جەڭىلدەتۋدى سۇراعان ەدى. سونداي-اق شەرنيازوۆتىڭ ادۆوكاتى كليەنتتەرىنىڭ ارەكەتىندە قىلمىس قۇرامىنىڭ بەلگىلەرى جوق ەكەنىن ايتىپ، ولارعا قاتىستى قىلمىستىق ءىستى توقتاتۋدى سۇراعان.
ال 2023 جىلدىڭ ماۋسىمىندا الماتىدا مەيىرجان تورەباەۆ پەن مەيىرحان شەرنيازوۆقا، سونداي-اق قارجى پيراميداسى ءىسى بويىنشا باسقا دا ايىپتالۋشىلارعا سوت ۇكىمى شىققان ەدى.
