21 ناۋرىزدا يران ءيزرايلدىڭ وڭتۇستىگىندەگى ديمونا قالاسىنا زىمىران سوققىسىن جاسادى. بۇل قالادا ءيزرايلدىڭ ءبىر يادرولىق نىسانى ورنالاسقان. يزرايل قورعانىس ارمياسى (تساحال) وقيعا جاعدايلارىن تەرگەۋ باستالعانىن مالىمدەدى.
ءيزرايلدىڭ «ماگەن داۆيد ادوم» قۇتقارۋ قىزمەتىنىڭ مالىمەتىنە سايكەس، شابۋىلدان 40-تان استام ادام زارداپ شەككەن. زارداپ شەككەندەر اراسىندا اۋىر جاراقات العان 10 جاسار بالا جانە ورتاشا اۋىرلىقتاعى ايەل بار.
The Jerusalem Post باسىلىمى زىمىراننىڭ تۇرعىن ءۇي عيماراتىنا تيگەنىن، ناتيجەسىندە عيمارات قۇلاعانىن حابارلادى.
سول كۇنى تاڭەرتەڭ يران اقش پەن ءيزرايلدى ناتانزداعى ۋران بايىتۋ كەشەنىنە شابۋىل جاسادى دەپ ايىپتادى. يران اتوم ەنەرگياسى ۇيىمى بۇل وقيعانى «حالىقارالىق زاڭداردى بۇزۋ» دەپ اتادى. رەسەي دە شابۋىلدى حالىقارالىق قۇقىقتى بۇزۋ دەپ سىنادى.
يراننىڭ رەسمي تۇلعالارى ديمونا قالاسىنا جاسالعان زىمىران سوققىسى وسى شابۋىلعا جاۋاپ ەكەنىن حابارلادى. يزرايل ءوز تاراپىنان ناتانزداعى يادرولىق نىسانعا قاتىسى جوق ەكەنىن ايتتى.
ماگاتە وكىلدەرى ديموناداعى يادرولىق نىسانعا زيان كەلتىرىلگەنى تۋرالى دەرەكتەردىڭ جوقتىعىن حابارلادى. ايماقتىق بيلىك رادياتسيا دەڭگەيىنىڭ كوتەرىلگەنى تۋرالى حابارلاماعان، ال اگەنتتىك جاعدايدى باقىلاپ، قوسىمشا اقپارات ىزدەۋدى جالعاستىرادى.
ەسكە سالساق، 28 اقپاننان باستاپ اقش پەن يزرايل يرانعا اۆياتسيالىق سوققىلار جاساپ كەلەدى. ناتيجەسىندە يراننىڭ جوعارعى كوشباسشىسى اياتوللا ءالي حامەنەي جانە بىرقاتار جوعارى لاۋازىمدى شەنەۋنىكتەر قازا تاپتى. يران پارسى شىعاناعى ايماعىنداعى كورشىلەس مەملەكەتتەرگە زىمىراندار مەن درونداردى پايدالانىپ شابۋىلدار جاساۋدا. وسى شابۋىلداردان ازەربايجان مەن كيپر دە زارداپ شەكتى.
