21 наурызда Иран Израильдің оңтүстігіндегі Димона қаласына зымыран соққысын жасады. Бұл қалада Израильдің бір ядролық нысаны орналасқан. Израиль қорғаныс армиясы (ЦАХАЛ) оқиға жағдайларын тергеу басталғанын мәлімдеді.
Израильдің «Маген Давид Адом» құтқару қызметінің мәліметіне сәйкес, шабуылдан 40-тан астам адам зардап шеккен. Зардап шеккендер арасында ауыр жарақат алған 10 жасар бала және орташа ауырлықтағы әйел бар.
The Jerusalem Post басылымы зымыранның тұрғын үй ғимаратына тигенін, нәтижесінде ғимарат құлағанын хабарлады.
Сол күні таңертең Иран АҚШ пен Израильді Натанздағы уран байыту кешеніне шабуыл жасады деп айыптады. Иран атом энергиясы ұйымы бұл оқиғаны «халықаралық заңдарды бұзу» деп атады. Ресей де шабуылды халықаралық құқықты бұзу деп сынады.
Иранның ресми тұлғалары Димона қаласына жасалған зымыран соққысы осы шабуылға жауап екенін хабарлады. Израиль өз тарапынан Натанздағы ядролық нысанға қатысы жоқ екенін айтты.
МАГАТЭ өкілдері Димонадағы ядролық нысанға зиян келтірілгені туралы деректердің жоқтығын хабарлады. Аймақтық билік радиация деңгейінің көтерілгені туралы хабарламаған, ал агенттік жағдайды бақылап, қосымша ақпарат іздеуді жалғастырады.
Еске салсақ, 28 ақпаннан бастап АҚШ пен Израиль Иранға авиациялық соққылар жасап келеді. Нәтижесінде Иранның жоғарғы көшбасшысы аятолла Әли Хаменеи және бірқатар жоғары лауазымды шенеуніктер қаза тапты. Иран Парсы шығанағы аймағындағы көршілес мемлекеттерге зымырандар мен дрондарды пайдаланып шабуылдар жасауда. Осы шабуылдардан Әзербайжан мен Кипр де зардап шекті.
