Coca-Cola Içecek Kazakhstan كومپانياسى اقتوبەدە زاۋىت سالادى. جوبانى «كوكا-كولا الماتى بوتتلەرس» بىرلەسكەن كاسىپورنى جۇزەگە اسىرادى، دەپ حابارلايدى «ادىرنا» ءتىلشىسى وبلىس اكىمدىگىنە سىلتەمە جاساپ.
ءوڭىر اكىمى اسحات شاحاروۆ كومپانياسىنىڭ باس ديرەكتورى ۆەلي دينچەلدى قابىلداپ، ينۆەستيتسيالىق جوبانى ىسكە اسىرۋ كەزەڭدەرى جانە جەرگىلىكتى اتقارۋشى ورگاندارمەن ءوزارا ءىس-قيمىل ماسەلەلەرىن تالقىلادى.
زاۋىت قۇرىلىسىنا سالىناتىن ينۆەستيتسيانىڭ جالپى كولەمى – 41,9 ملرد تەڭگە. كاسىپورىننىڭ جوبالىق قۋاتى جىلىنا 280 ملن ليتر الكوگولسىز سۋسىن وندىرۋگە جەتەدى. نىساندى پايدالانۋعا بەرۋ 2027 جىلعا جوسپارلانعان.
«Coca-Cola Içecek زاۋىتىن سالۋ جوباسىن ىسكە اسىرۋ اقتوبە وبلىسىنىڭ ونەركاسىپتىك الەۋەتىن دامىتۋداعى ماڭىزدى قادام بولماق. بۇل تەك قوماقتى ينۆەستيتسيا تارتۋ عانا ەمەس، جاڭا جۇمىس ورىندارىن اشۋ، زاماناۋي تەحنولوگيالار مەن ءوندىرىستىڭ ەكولوگيالىق ستاندارتتارىن ەنگىزۋ دەگەن ءسوز. جەرگىلىكتى اتقارۋشى ورگاندار تاراپىنان ينۆەستورعا جوبانى جۇزەگە اسىرۋدىڭ بارلىق كەزەڭىندە جان-جاقتى قولداۋ كورسەتىلەدى»، — دەپ اتاپ ءوتتى ءوڭىر باسشىسى.
جوبا اياسىندا 150 جۇمىس ورنى قۇرىلادى. بۇل ءوڭىردىڭ ونەركاسىپتىك الەۋەتىن ارتتىرۋعا جانە حالىقتى جۇمىسپەن قامتۋعا ەلەۋلى ۇلەس بولماق. قازىرگى تاڭدا كاسىپورىن قۇرىلىسى ءۇشىن 41-رازەزد اۋدانىنان 25 گەكتار جەر تەلىمى ءبولىنىپ، جوبالاۋ جانە دايىندىق جۇمىستارى جۇرگىزىلۋدە.
