تاجىكستان استاناسى دۋشانبە قالاسىندا رامازان ايى كەزىندە ەت باعاسىن نەگىزسىز كوتەرگەن ءتورت كاسىپكەر اكىمشىلىك جاۋاپكەرشىلىككە تارتىلدى. ورازا ۋاقىتىندا ازىق-تۇلىك باعاسىنىڭ جاساندى وسۋىنە جول بەرمەۋ ماقساتىندا قالا اۋماعىندا ارنايى تەكسەرۋ شارالارى ۇيىمداستىرىلعان، دەپ حابارلايدى “ادىرنا”.
تەكسەرۋ بارىسىندا شوحمانسۋر اۋدانىندا ەكى زاڭبۇزۋشىلىق دەرەگى انىقتالدى. بۇعان دەيىن رەسمي تۇردە باعانى تۇراقتى ۇستاۋ جونىندە ەسكەرتۋ العان كاسىپكەرلەر سوعان قاراماستان، ەت ونىمدەرىنىڭ قۇنىن قىمباتتاتىپ ساتقان. اۋداندىق سوت شەشىمىمەن ولار بەس تاۋلىككە اكىمشىلىك قاماۋعا الىندى.
وسىنداي تاعى ەكى جاعداي سينو اۋدانىندا تىركەلدى. ازىق-تۇلىك دۇكەندەرىنىڭ بىرىندە ەتتىڭ نەگىزسىز جوعارى باعامەن ساتىلعانى بەلگىلى بولدى. كاسىپكەرلەر تۇتىنۋشىلار سۇرانىسىن پايدالانىپ، باعانى ادەيى وسىرگەن. اتالعان فاكتىلەر بويىنشا اكىمشىلىك قۇقىق بۇزۋشىلىق تۋرالى حاتتامالار تولتىرىلىپ، سينو اۋداندىق سوتىنىڭ قاۋلىسىمەن ارقايسىسىنا ءتورت تاۋلىك اكىمشىلىك قاماۋ جازاسى تاعايىندالدى.
