18 اقپان كۇنى رەسەي، اقش جانە ۋكراينا اراسىندا وتكەن كەلىسسوزدەر ەكى ساعاتقا سوزىلدى. بۇل تۋرالى جەنەۆاداعى كەلىسسوزدەردە رەسەي دەلەگاتسياسىن باسقارعان ۆلاديمير مەدينسكي مالىمدەدى، دەپ حابارلايدى «ادىرنا» ءتىلشىسى.
«وزدەرىڭىز بىلەتىندەي، كەلىسسوزدەر ەكى كۇن ءوتتى. كەشە ءارتۇرلى فورماتتا وتە ۇزاققا سوزىلدى، ال بۇگىن تاعى شامامەن ەكى ساعاتقا جالعاستى. ولار اۋىر، بىراق ىسكەرلىك سيپاتتا ءوتتى»، – دەدى ول جۋرناليستەرگە كەزدەسۋدەن كەيىن.
مەدينسكيدىڭ ايتۋىنشا، كەلىسسوزدەردىڭ جاڭا راۋندى جاقىن ۋاقىتتا وتەدى. بۇل اقپاراتتى «ينتەرفاكس» اگەنتتىگىنىڭ دەرەككوزى دە راستادى. سونداي-اق رەسەي وكىلدەرىنىڭ 18 اقپاندا ماسكەۋگە قايتاتىنى ايتىلدى.
ۋكراينا دەلەگاتسياسىن ۇلتتىق قاۋىپسىزدىك جانە قورعانىس كەڭەسىنىڭ حاتشىسى رۋستەم ۋمەروۆ باسقاردى. ول كەلىسسوزدەر بارىسىندا بەلگىلى ءبىر ىلگەرىلەۋ بولعانىن جانە كەيبىر ماسەلەگە تۇسىنىكتەمە ەنگىزىلگەنىن ايتتى. الايدا «قازىرگى كەزەڭدە ەگجەي-تەگجەيىن جاريالاۋعا بولمايتىنىن» اتاپ ءوتتى.
ەكى كۇندىك كەلىسسوزدەر قورىتىندىسى بويىنشا ۋكراينا پرەزيدەنتى ۆلاديمير زەلەنسكي اسكەري باعىتتا بەلگىلى ءبىر پروگرەسس بار ەكەنىن مالىمدەدى. الايدا ول ساياسي ماسەلەلەر بويىنشا، اسىرەسە دونباسسقا باقىلاۋ ورناتۋ جانە زاپوروجە اتوم ەلەكتر ستانساسىنا قاتىستى ءوز دەلەگاتسياسىنان اسكەري سالاداعىداي ىلگەرىلەۋ تۋرالى اقپارات ەستىمەگەنىن ايتتى.
سونىمەن قاتار ۋكراينا پرەزيدەنتى جەنەۆاداعى كەلىسسوزدەرگە ەۋروپالىق ەلدەر وكىلدەرىنىڭ كوپتەپ قاتىسقانىن اتاپ ءوتتى.
ء«بىز ءۇشىن ەۋروپانىڭ قاتىسۋى وتە ماڭىزدى»، – دەدى زەلەنسكي.
