بۇگىن، 8 اقپاندا ساعات 10:23 شاماسىندا تالعار اۋدانىنا قاراستى بەساعاش اۋىلىنداعى «بۋراباي» كوتتەدج قالاشىعىندا تاۋ بەتكەيىنەن جەر ماسساسىنىڭ جىلجۋى تىركەلدى. بۇل تۋرالى الەۋمەتتىك جەلىلەردە ۆيدەو تارادى، دەپ حابارلايدى “ادىرنا”.
وقيعاعا كەيىنگى كۇندەردەگى تۇراقسىز اۋا رايى مەن توپىراقتىڭ شامادان تىس ىلعالدانۋى سەبەپ بولعان.
الماتى وبلىسى اكىمدىگى وقيعاعا قاتىستى مالىمدەمە جاسادى.
اقپاراتقا سايكەس، جىلجىعان توپىراق باياناۋىل كوشەسىندەگى №8 جانە №24ا جەكە تۇرعىن ۇيلەردىڭ اۋماعىنا تۇسكەن. جەر ماسساسى بەتوننان سالىنعان تىرەۋ قابىرعادان اسىپ وتكەن.
“باياناۋىل كوشەسى №8 مەكەنجايىندا كولەمى 15×5 مەتر بولاتىن باستىرما زاقىمدانىپ، HAVAL JOLION ماركالى جەڭىل اۆتوكولىككە جانە بولەك تۇرعان شارۋاشىلىق قۇرىلىسىنىڭ قابىرعالارىنا زيان كەلگەن. بۇل اۋماقتا جىلجىعان توپىراق كولەمى شامامەن 465 تەكشە مەتر بولدى. ال №24ا ءۇيدىڭ اۋماعىنا شامامەن 5 تەكشە مەتر توپىراق تۇسكەن، ايتارلىقتاي زاقىمدانۋ تىركەلمەگەن”، - دەلىنگەن حابارلامادا.
زارداپ شەككەندەر جوق. اكىمدىكتىڭ مالىمەتىنشە، №8 ۇيدە ءۇش ادام، ال باياناۋىل كوشەسىندەگى №12 ۇيدە بەس ادام تۇرادى.
بۇل اۋماقتاعى تۇرعىن ۇيلەر بۇرىن تاۋ بەتكەيىن ءوز بەتىنشە كەسۋ ارقىلى سالىنعان. قازىرگى ۋاقىتتا بەتكەيدىڭ جوعارعى بولىگىندەگى كوشەلەرگە كارىز جەلىلەرىن تارتۋ جوباسى ازىرلەنگەن. اكىمدىك الداعى بيۋدجەتتىك كوميسسيا وتىرىسىندا قۇرىلىس-مونتاج جۇمىستارىن قارجىلاندىرۋ جانە بەتكەيدى نىعايتۋ ءۇشىن سالا ماماندارىن تارتۋ ماسەلەسى قارالاتىنىن مالىمدەدى.
قازىر اۋماقتى توپىراقتان تازالاۋ جانە قالپىنا كەلتىرۋ جۇمىستارى جۇرگىزىلىپ جاتىر.
