گەرمانيانىڭ مانگەيم قالاسىنداعى فيلارمونيالىق وركەستر رەسەيلىك سكريپاچ ۆاديم رەپينمەن بىرگە جوسپارلانعان كونتسەرتىن وتكىزبەيتىن بولدى، دەپ حابارلايدى "ادىرنا" ۇلتتىق پورتالى DW-عا سىلتەپ.
22 اقپاندا مانگەيمنىڭ روزەنگارتەن زالىندا سەرگەي پروكوفەۆدىڭ ەكىنشى سكريپكالىق كونتسەرتى بولۋى ءتيىس ەدى.
كونتسەرتتىڭ وتكىزىلمەۋىنە ۋكراينا ەلشىلىگىنىڭ مانگەيم اكىمىنە جولداعان ۇندەۋى سەبەپ بولدى. بەلگىلى بولعانداي، كونتسەرت رەسەيدىڭ ۋكرايناعا باسىپ كىرۋىنىڭ ءتورتىنشى جىلدىعىنا ساي كەلدى. ەلشىلىك وكىلدەرى رەپيننىڭ كوپ جىل بويى كرەمل تاراپىنان قولداۋ العانىن، سوعىس باستالعاننان كەيىن دە ناگرادالار مەن مەملەكەتتىك قولداۋدى الىپ كەلگەنىن اتاپ ءوتتى.
وركەستر باسشىلىعى ۋكرايندىق قوعامنىڭ پىكىرىن ەسكەرىپ، كونتسەرتتى وتكىزبەۋ شەشىمىن قابىلداعانىن جەتكىزدى. كورەرمەنگە بيلەت اقشاسى قايتارىلادى.
مانگەيم فيلارمونيالىق وركەسترى 80 جاس مۋزىكانتتى بىرىكتىرىپ، 2009 جىلدان بەرى ەۋروپا مەن ازياداعى فەستيۆالدەردە بەلسەندى ونەر كورسەتىپ كەلەدى.
ايتا كەتەيىك، يتالياداعى Maggio Musicale تەاترىندا دا ۆاديم رەپيننىڭ جارى، بالەرينا سۆەتلانا زاحاروۆانىڭ قاتىسۋىمەن جوسپارلانعان ەكى سپەكتاكل ۋكرايناداعى جاعدايعا بايلانىستى وتكىزىلمەگەن.
