قازاقستاندىق اۋە كومپانيالارى ۇشاقتا قۇرت پەن باسقا دا قىشقىل ءسۇت ونىمدەرىن تاسىمالداۋ ەرەجەلەرىن ءتۇسىندىردى، دەپ حابارلايدى «ادىرنا» ءتىلشىسى tengrinews.kz-كە سىلتەمە جاساپ.
بۇعان دەيىن Threads الەۋمەتتىك جەلىسىنىڭ قولدانۋشىسى قالاارالىق اۋە رەيستەرىندە قىشقىل ءسۇت ونىمدەرىن الىپ جۇرۋگە بولا ما دەگەن ساۋال تاستاعان ەدى. بۇل جازبا قىزۋ تالقىلانىپ، اۋە كومپانيالارىنا تىكەلەي ساۋال جولداندى.
Vietjet Qazaqstan كومپانياسىنىڭ ءباسپاسوز قىزمەتىنىڭ حابارلاۋىنشا، قاتتى قىشقىل ءسۇت ونىمدەرىن، سونىڭ ىشىندە قۇرتتى قول جۇگىندە الىپ جۇرۋگە رۇقسات ەتىلەدى.
«ولاردىڭ سالماعىنا قاتىستى ارنايى شەكتەۋ جوق، ەڭ باستىسى – قول جۇگىنىڭ جالپى سالماعى اۋە كومپانياسىنىڭ ەرەجەسىنە ساي بولۋى كەرەك»، – دەپ ناقتىلادى كومپانيا وكىلدەرى.
ال قىشقىل ءسۇتتى سۋسىندارعا قاتىستى تالاپ قاتاڭىراق. قىمىز، شۇبات، ايران جانە باسقا دا سۇيىق ونىمدەردى ۇشاق سالونىنا الىپ كىرۋگە بولمايدى.
«مۇنداي سۋسىنداردى جۇككە وتكىزۋگە رۇقسات بار، بىراق ولار سالقىنداتىلعان كۇيدە جانە وندىرىستىك قاپتامادا بولۋعا ءتيىس. قاپتامادا تاۋاردىڭ شتريح-كودى، ءوندىرۋشى تۋرالى اقپارات كورسەتىلۋى قاجەت. سونداي-اق، كولەمى ءبىر جولاۋشىعا 5 ليتردەن اسپاۋى كەرەك»، – دەدى كومپانيا وكىلدەرى.
FlyArystan اۋە كومپانياسىندا ءسۇت جانە قىشقىل ءسۇت ونىمدەرىن قاتاڭ شارتتارمەن عانا تاسىمالداۋعا بولادى:
* ونىمدەر تەك سالقىنداتىلعان كۇيدە قابىلدانادى;
* تەك تىركەلگەن جۇك رەتىندە وتكىزىلەدى (قول جۇگىندە بولمايدى);
* مۇنداي جۇك Limited Release جاپسىرماسىمەن تاڭبالانادى (ياعني تاسىمالداۋشىنىڭ جاۋاپكەرشىلىگى شەكتەۋلى).
قاپتاماعا دا قوسىمشا تالاپتار بار:
* ىدىس بەرىك، گەرمەتيكالىق جابىلعان بولۋى كەرەك جانە كولەمىنىڭ 4/5 بولىگىنە دەيىن عانا تولتىرىلۋعا ءتيىس;
* اعىپ كەتپەۋى ءۇشىن ءونىمدى ءۇش قاباتتى پوليەتيلەنگە وراپ،
* سىرتىنان قاتتى قوراپقا (مىسالى، كارتون قوراپ) سالۋ قاجەت.
SCAT اۋە كومپانياسىندا ەرەجەلەر ودان دا قاتاڭ: قىشقىل ءسۇت ونىمدەرىن ءارى تىركەلگەن باگاجدا دا، ءارى قول جۇگىندە دە تاسىمالداۋعا تىيىم سالىنادى.
ەرەكشەلىك تەك:
* بالالار تاعامىنا،
* جانە دارىگەر تاعايىنداعان ارنايى ديەتالىق تاعامعا عانا جاسالادى.
Air Astana ەرەجەلەرىندە قۇرت پەن باسقا قىشقىل ءسۇت ونىمدەرىن تاسىمالداۋعا تىكەلەي تىيىم سالىنباعان. دەگەنمەن، جولاۋشىلار تاعام الىپ جۇرۋگە قاتىستى جالپى تالاپتاردى ساقتاۋى كەرەك.
مىسالى اعىپ كەتۋدىڭ جانە جاعىمسىز ءيىستىڭ الدىن الۋ ءۇشىن ءونىم تەك بەرىك ءارى ءبۇتىن قاپتامادا قابىلدانادى. قاپتاما كەمىندە ءۇش قاباتتان تۇرۋى كەرەك، ال ءبىرىنشى جانە سوڭعى قابات مىندەتتى تۇردە تىعىز پوليەتيلەننەن جاسالۋى ءتيىس.
ساپارعا قۇرت نەمەسە باسقا قىشقىل ءسۇت ونىمدەرىن الماس بۇرىن، جولاۋشىلار ناقتى اۋە كومپانياسىنىڭ تالاپتارىن الدىن الا تەكسەرگەنى دۇرىس. سەبەبى ءبىر كومپانيا رۇقسات بەرگەن ءونىمدى ەكىنشىسى مۇلدە قابىلداماۋى مۇمكىن.
