يراندا توعىز كۇنگە سوزىلعان جاپپاي نارازىلىقتار بارىسىندا كەم دەگەندە 35 ادام قازا تاۋىپ، 1200-دەن استام ادام قاماۋعا الىندى، دەپ حابارلايدى "ادىرنا" ۇلتتىق پورتالى DW اگەنتتىگىنە سىلتەپ.
يرانداعى ادام قۇقىقتارى بەلسەندىلەرى ۇيىمى مەن HRANA مەديا جەلىسىنىڭ 5 قاڭتاردا جاريالاعان دەرەكتەرىنە سايكەس، قازا تاپقانداردىڭ 29-ى نارازىلىق بىلدىرۋشىلەر، تورتەۋى – بالالار، ال ەكەۋى قاۋىپسىزدىك كۇشتەرىنىڭ قىزمەتكەرلەرى.
جەلتوقسان ايىنىڭ سوڭىندا باستالعان نارازىلىق ەلدەگى 27 پروۆينتسيانىڭ 88 قالا مەن ەلدى مەكەنىن قامتىعان.
قۇقىق قورعاۋشىلاردىڭ مالىمدەۋىنشە، قاۋىپسىزدىك كۇشتەرى دەمونسترانتتارعا قارسى كۇش قولدانعان. بۇل ارەكەتتەر مەشحەد پەن استانا تەگەراندى قوسا العاندا، ءىرى قالالاردا نارازىلىقتىڭ جاڭا تولقىنىن تۋىنداتقان. ەل بويىنشا كەمىندە 17 ۋنيۆەرسيتەتتىڭ ستۋدەنتتەرى دە نارازىلىق اكتسيالارىنا قوسىلعان.
باق مالىمەتىنشە، بيلىك تاراپىنان جاۋاپ رەتىندە قاۋىپسىزدىك كۇشتەرى بىرقاتار وقۋ ورىندارىنىڭ اۋماعىنا كىرىپ، كامپۋستاردا ارنايى وپەراتسيالار جۇرگىزگەن.
5 قاڭتاردا يران يسلام رەسپۋبليكاسىنىڭ سوت بيلىگى نارازىلىق كەزىندە ۇستالعان ازاماتتارعا ەشقانداي جەڭىلدىك جاسالمايتىنىن مالىمدەدى. نارازىلىقتار 28 جەلتوقساننان باستاپ تەگەراننىڭ باستى بازارىندا باستالعان. وندا ساۋداگەرلەر ينفلياتسيا مەن باعانىڭ كۇرت وسۋىنە نارازىلىق ءبىلدىرىپ، دۇكەندەرىن جاپقان.
رەسەيدەن العاشقى ۇشاق كەلىپ قوندى. "شاقىرىلماعان قوناقتاردى" تيبيليسي تۇرعىندارى شەرۋلەتە قارسى الدى
