حرومتاۋ قالاسىنىڭ بۇرىنعى اكىمى ساعىندىق شابىقباەۆ پارا العانى ءۇشىن كىنالى دەپ تانىلىپ، ايىپپۇل ارقالادى، دەپ حابارلايدى «ادىرنا» ءتىلشىسى «دياپازونعا» سىلتەمە جاساپ.
ءىس ماتەريالدارىنا سايكەس، شەنەۋنىك مەملەكەتتىك ساتىپ الۋ اياسىندا ورىندالعان جۇمىستاردى ەش كەدەرگىسىز قابىلداعانى ءۇشىن مەردىگەردەن 400 مىڭ تەڭگە كولەمىندە پارا العان. پارانى بەرۋ كەزىندە دەلدال رەتىندە اكىمنىڭ تانىسى نۇربەك قازبەك ارەكەت ەتكەن. ول مەردىگەرمەن كەلىسسوز جۇرگىزگەن. نۇربەك قازبەككە پارا تالاپ ەتۋ دەرەگى بويىنشا دا ايىپ تاعىلعان، الايدا بۇل ەپيزود بويىنشا مەردىگەر تاراپىنان كەشىرىم جاسالعان.
ەكى ايىپتالۋشى دا كىنالارىن تولىق مويىندادى. ءىس قىسقارتىلعان تارتىپپەن قارالعان.
حرومتاۋ قالاسىنىڭ بۇرىنعى اكىمى ساعىندىق شابىقباەۆقا العان پاراسىنىڭ 30 ەسەلەنگەن مولشەرىندە، ياعني 12 ميلليون تەڭگە كولەمىندە ايىپپۇل تاعايىندالدى. قاماۋدا بولعان ۋاقىتى ەسەپكە الىنىپ، ايىپپۇلدىڭ تۇپكىلىكتى سوماسى 11 355 151 تەڭگەنى قۇرادى. سونداي-اق ول ءومىر بويىنا مەملەكەتتىك قىزمەتتە، سوت ورگاندارىندا جانە جەرگىلىكتى ءوزىن-ءوزى باسقارۋ ورگاندارىندا قىزمەت اتقارۋ قۇقىعىنان ايىرىلدى. نۇربەك قازبەك تە كىنالى دەپ تانىلىپ، وعان دا پارانىڭ 30 ەسەلەنگەن مولشەرىندە – 12 ميلليون تەڭگە ايىپپۇل سالىندى. قاماۋدا بولعان ۋاقىتى (660 576 تەڭگە) ەسەپكە الىنىپ، ايىپپۇلدىڭ تۇپكىلىكتى سوماسى 11 339 424 تەڭگەنى قۇرادى.
ايتا كەتەيىك، ەندى حرومتاۋ قالاسىندا اكىمدى قايتا سايلاۋ وتەدى. داۋىس بەرۋ 11 قاڭتارعا بەلگىلەنگەن.
40 جاستاعى ساعىندىق شابىقباەۆ حرومتاۋ قالاسىنىڭ اكىمى قىزمەتىنە 2023 جىلدىڭ قىركۇيەگىندە تاعايىندالعان. ەڭبەك جولىن وبلىستىق حقكو فيليالىندا ينسپەكتور بولىپ باستاعان. كەيىن ايتەكە بي اۋدانى، حرومتاۋ اۋدانى جانە حرومتاۋ قالاسى اكىمدىكتەرىنىڭ اپپاراتتارىندا قىزمەت اتقارعان. 2018 جىلدىڭ جەلتوقسانىنان 2023 جىلدىڭ قىركۇيەگىنە دەيىن حرومتاۋ اكىمىنىڭ ورىنباسارى بولعان. 2025 جىلدىڭ قاراشاسىندا ول پارا الدى دەگەن كۇدىكپەن ۇستالىپ، ەكى ايعا قاماۋعا الىنعان. 11 جەلتوقساندا بۇل ءىس بويىنشا سوت پروتسەسى باستالعان.
