بايقوڭىرداعى «سويۋز» زىمىراندارىنىڭ ستارتقا قاجەت تەحنيكالىق قۇرىلىمىنىڭ زاقىمدانۋىنا بايلانىستى رەسەيدىڭ پيلوتتالعان عارىش باعدارلاماسى توقتاتىلعان جوق. بۇل تۋرالى «روسكوسموس» ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
«مەملەكەتتىك كورپوراتسيا باس ديرەكتورىنىڭ ورىنباسارى دميتري بارانوۆ رەسەيلىك پيلوتتالعان باعدارلامانىڭ توقتاتىلعانى تۋرالى مالىمدەمەلەردى جوققا شىعارىپ، بۇل ماسەلە توڭىرەگىندە الىپ-قاشپا اڭگىمەلەرگە جول بەرمەۋگە شاقىردى»، – دەلىنگەن حابارلامادا.
قازىرگى ۋاقىتتا زىمىران تاسىعىشتى قالپىنا كەلتىرۋگە قاجەت بارلىق ەلەمەنت پەن جابدىقتار جەتكىزىلگەن. جۇمىستار ەكى اۋىسىمدا جۇرگىزىلىپ جاتىر.
بۇعان دەيىن «روسكوسموس» 27 قاراشادا «سويۋز-2.1ا» زىمىرانى ۇشىرىلعاننان كەيىن بايقوڭىرداعى ۇشىرۋ ۇستەلىنىڭ بىرقاتار ەلەمەنتى زاقىمدانعانىن حابارلاعان ەدى. سول كەزدە مەملەكەتتىك كورپوراتسيا قالپىنا كەلتىرۋگە بارلىق قاجەتتى رەزەرۆتىك بولشەكتەردىڭ بار ەكەنىن جانە زاقىمدار جاقىن ۋاقىتتا جويىلاتىنىن مالىمدەگەن.
زىمىران حالىقارالىق عارىش ستانتسياسىنا «سويۋز مس-28» كەمەسىن ۇشىردى. ونىڭ بورتىندا «روسكوسموس» عارىشكەرلەرى سەرگەي كۋد-سۆەرچكوۆ پەن سەرگەي ميكاەۆ، سونداي-اق NASA استروناۆتى كريستوفەر ۋيليامس بولدى.
