«اق بۇلاق» تاۋ شاڭعىسى كۋرورتى الداعى قىسقى ماۋسىمعا دايىن ەكەنىن مالىمدەدى، دەپ حابارلايدى "ادىرنا" ۇلتتىق پورتالى.
كۋرورت ينفراقۇرىلىمىن، تەحنيكالىق پاركىن جانە قىزمەت كورسەتۋ جۇيەسىن جاڭارتقان. بۇل تۋرالى ءباسپاسوز كونفەرەنتسياسىندا ايتىلدى.
كۋرورتتىڭ تەحنيكالىق ءبولىم باسشىسىنىڭ ورىنباسارى سۇڭقار يسكاكوۆتىڭ ايتۋىنشا، بيىلعى باستى باسىمدىق – ماۋسىمدى قاۋىپسىز ءارى ساپالى باستاۋ. ونىڭ سوزىنشە، جاڭا باسقارمانىڭ كەلۋىمەن كۋرورتتا كەشەندى جاڭعىرتۋ جۇرگىزىلگەن.
بيىل تاۋ بەتكەيلەرىن دايىنداۋ ءۇشىن تەحنيكالىق پارك ايتارلىقتاي تولىقتىرىلىپ، 100-ءشى راتراك ىسكە قوسىلدى. قازىرگى تاڭدا ول نەگىزگى تراسسالاردىڭ بىرىندە جۇمىس ىستەپ جاتىر. الداعى كۇندەرى مەرەكەگە دەيىن بارلىق نەگىزگى تراسسالار ءمىنسىز كۇيگە كەلتىرىلەدى. سونىمەن قاتار ءۇشىنشى تراسسادا جۇمىستار جالعاسىپ، ماۋسىم بارىسىندا اشىلاتىن باعىتتار سانى كەزەڭ-كەزەڭىمەن ارتپاق.
ينفراقۇرىلىم دا نازاردان تىس قالعان جوق. بۇعان دەيىن سىنعا ۇشىراپ كەلگەن اۆتوتۇراق تولىق اسفالتتالىپ، كاسسالار، جابدىقتاردى جالعا بەرۋ پۋنكتى مەن تاۋ شاڭعىسى مەكتەبى ورنالاسقان كوپفۋنكتسيالى كەشەنگە كۇردەلى جوندەۋ جۇرگىزىلدى.
ماۋسىمداعى باستى جاڭالىقتاردىڭ ءبىرى – تاۋعا كىرۋ جانە باقىلاۋ جۇيەسىنىڭ جاڭارتىلۋى. كۋرورت اۋماعىندا Access 2025 جۇيەسىنىڭ سوڭعى نۇسقاسى ورناتىلىپ، جاڭا تۋرنيكەتتەر ىسكە قوسىلدى. ەندى دەمالۋشىلار سكي-پاسستى بانك قوسىمشالارى ارقىلى ونلاين ساتىپ الا الادى.
سونىمەن قاتار كۋرورت جىل بويى جۇمىس ىستەيتىن دەمالىس ايماعىنا اينالۋدى كوزدەپ وتىر. ماۋسىمارالىق كەزەڭدە دە سپورتتىق جانە ساۋىقتىرۋ جوبالارىن دامىتۋ جوسپارلانعان.
تۇنگى سىرعاناۋ دا جاڭاشا فورماتتا ۇسىنىلادى. ول ءۇشىن 70 جارىق پروجەكتورى ورناتىلعان. العاشقى كەزەڭدە تۇنگى سىرعاناۋ جۇما جانە سەنبى كۇندەرى ۇيىمداستىرىلادى.
باعا ساياساتى دا تۇراقتى. كۋرورت وكىلدەرىنىڭ ايتۋىنشا، تاريفتەر وتكەن جىلمەن سالىستىرعاندا شامامەن 2–3 مىڭ تەڭگەگە عانا وزگەرگەن. قازىرگى تاڭدا كۇندىزگى سىرعاناۋ قۇنى جۇمىس كۇندەرى 16 مىڭ تەڭگەدەن، دەمالىس كۇندەرى 18 مىڭ تەڭگەدەن باستالادى. تاڭعى تاريف – 12 مىڭ تەڭگە، تۇنگى سىرعاناۋ – 9 500 تەڭگە. سكي-پاسس كارتاسىنىڭ باعاسى – 2 000 تەڭگە.
ساتۋ جانە ماركەتينگ ديرەكتورى جۇلدىز بايبولوۆانىڭ ايتۋىنشا، بارلىق تاريفتەردى Kaspi ارقىلى تولىقتىرۋعا، بيلەتتەردى الدىن الا كەز كەلگەن كۇنگە راسىمدەۋگە مۇمكىندىك بار. جاقىن ۋاقىتتا جەكە تۇلعاعا بايلاناتىن ماۋسىمدىق جانە جىلدىق ابونەمەنتتەردى ەنگىزۋ جوسپارلانىپ وتىر.
ايتا كەتەيىك، «اق بۇلاق» كۋرورتىندا بيىكتىگى 1250–1800 مەتر ارالىعىنداعى 14 تراسسا جانە 5 ءتۇرلى ارقان جولى بار.
