باق بايمسك جوباسىنىڭ KAZ Minerals اكتسيونەرى ۆلاديمير كيممەن بايلانىسىن انىقتادى. سانكتسيالار ەنگىزىلگەننەن كەيىن اكتيۆتەر جابىق قورعا بەرىلگەنىمەن، باسقارۋشىلار بۇرىنعى كۇيىندە قالعان، دەپ حابارلايدى «ادىرنا» ءتىلشىسى Orda.kz-كە سىلتەمە جاساپ.
«سيستەما» زەرتتەۋشىلەرى رەسەي اركتيكاسىنداعى ەڭ ءىرى جەكە جوبانىڭ نۇرسۇلتان نازارباەۆتىڭ اينالاسىنداعى ادامدارمەن بايلانىسى بار ەكەنىن مالىمدەدى. اڭگىمە قۇنى 1,1 ترلن ءرۋبلدى (7,33 ترلن تەڭگە) قۇرايتىن چۋكوتكاداعى بايمسك تاۋ-كەن بايىتۋ كومبيناتى تۋرالى بولىپ وتىر. قۇرىلىس 46 نىساندى قامتيدى، ولاردىڭ قاتارىندا جاعالاۋداعى قالقىمالى اتوم ستانتسياسى، جاڭا پورت جانە 400 شاقىرىم جول بار. جوسپار بويىنشا بۇل جوبا رەسەيدەگى مىس ءوندىرۋ كولەمىن 25 پايىزعا، ال التىن ءوندىرۋدى 4 پايىزعا ارتتىرۋى ءتيىس.
«2018 جىلعا دەيىن جوبا رومان ابراموۆيچ پەن ونىڭ سەرىكتەستەرىنە تيەسىلى بولعان. كەيىن ونى قازاقستاندىق KAZ Minerals ساتىپ الدى. الايدا 2022 جىلى باستالعان سوعىس پەن اقش سانكتسيالارىنان كەيىن جوبا جابىق فوندقا وتكىزىلىپ، ناقتى يەلەرى كورسەتىلمەگەن»،- دەلىنگەن حابارلامادا.
زەرتتەۋشىلەردىڭ مالىمەتىنشە، جوبا ءالى دە KAZ Minerals كومپانياسىنىڭ نەگىزگى اكتسيونەرى ۆلاديمير كيممەن بايلانىستى. ونى بىرنەشە رەت قازاقستاننىڭ تۇڭعىش پرەزيدەنتىنىڭ سەنىمدى ادامى ءارى ء«اميانى» دەپ اتاعان. ماتەريالداردا كيمنىڭ 2005 جىلى نازارباەۆتىڭ سايلاۋالدى شتابىندا قىزمەت ەتكەنى جانە وتباسى قورلارىن قارجىلاندىرعانى تۋرالى بولجامدار كەلتىرىلەدى. جۋرناليستەردىڭ ايتۋىنشا، كيمگە جاقىن كومپانيالار ءتىپتى نازارباەۆ ءۇشىن ۇشاقتار ساتىپ العان بولۋى مۇمكىن. الايدا اتالعان ۇيىمدار بۇل دەرەكتەردى جوققا شىعارعان.
بايمسك جوباسى مەنەدجەرلەرىنىڭ ءومىرباياندارى دا كيممەن بايلانىستى كورسەتەدى. 2024 جىلى حولدينگتى قازاقستان ازاماتشاسى ەلەنا راسكوشنايا باسقاردى. ول بۇعان دەيىن «2كوم»، «تسيفرا ودين» جانە «سەتەل» كومپانيالارى باسشىلارىنىڭ ورىنباسارى بولعان. بۇل كومپانيالاردىڭ بارلىعى «الماتەل» توبىنا كىرگەن، ال ونىڭ يەسى رەتىندە ۆلاديمير كيم اتالىپ كەلگەن.
جوبانى باسقاراتىن كومپانيانىڭ باس ديرەكتورى قىزمەتىندە گەورگي فوتين قالىپ وتىر. ول بۇعان دەيىن ماسكەۋدەگى «كاز مينەرالز» جشق-نى باسقارعان. سونداي-اق ول گوك قۇرىلىسىن جۇزەگە اسىرعان «ۆەگا رازۆيتيە» كومپانياسىن دا باسقارادى. كومپانيا دۋبايدا تىركەلگەن Nord Rim DMCC-گە تيەسىلى، ال جۋرناليستەر ونى كيمنىڭ بانكىمەن بايلانىستى قۇرىلىمداردىڭ قاتارىنا جاتقىزادى.
جوبا رەسەي بيلىگىنەن بىرقاتار ەرەكشە جەڭىلدىك العان. العاشقى بەس جىل بويى مۇلىك، پايدا جانە جەر سالىعى نولگە تەڭ بولىپ بەكىتىلگەن.
2022 جىلدان كەيىن تۇڭعىش پرەزيدەنت نۇرسۇلتان نازارباەۆ ساياساتتان كەتكەندەي كورىنگەنىمەن، ول رەسەي پرەزيدەنتىمەن ءجيى كەزدەسىپ تۇرادى. سوڭعى كەزدەسۋ 2025 جىلدىڭ مامىرىندا كرەملدە وتكەن. ەكس-پرەزيدەنتتىڭ وكىلدەرى بۇل كەزدەسۋدىڭ بەيرەسمي سيپاتتا بولعانىن جانە «كوپجىلدىق دوستىق قارىم-قاتىناسقا نەگىزدەلگەنىن» مالىمدەگەن.
بۇل بايلانىستار “سيستەما” زەرتتەۋىنشە، رەسەيلىك ستراتەگيالىق جوبالاردىڭ ارتىندا نازارباەۆقا جاقىن توپتاردىڭ بولۋى مۇمكىن دەگەن كۇدىكتى كۇشەيتەدى.
ايتا كەتەيىك، «KAZ Minerals» جانە «قازاقمىس» كومپانيالارى ۆلاديمير كيمنىڭ باقىلاۋىندا. ول «KAZ Minerals»اكتسيالارىنىڭ 63,5 پايىزىنا جانە «قازاقمىس» اكتسيالارىنىڭ 70 پايىزىنا يەلىك ەتەدى. ەكى حولدينگتىڭ دە تابىسى جوعارى دەڭگەيدە قالىپ وتىر. تەك 2023 جىلدىڭ قورىتىندىسى بويىنشا KAZ Minerals Limited قۇرىلىمدارىنىڭ ءبىرى 2,15 ملرد دوللاردان استام پايدا تاپقان. بۇعان قاراماستان، كومپانيا وندىرىستىك اپاتتاردان زارداپ شەگۋدى جالعاستىرىپ كەلەدى: 2024 جىلدىڭ تامىز ايىنىڭ سوڭىندا جانە قىركۇيەكتىڭ باسىندا KAZ Minerals شاحتالارىندا بەس ادام قازا تاپقان بولاتىن.
