BAQ Baimsk jobasynyŋ KAZ Minerals aksionerı Vladimir Kimmen bailanysyn anyqtady. Sanksiialar engızılgennen keiın aktivter jabyq qorǧa berılgenımen, basqaruşylar būrynǧy küiınde qalǧan, dep habarlaidy «Adyrna» tılşısı Orda.kz-ke sılteme jasap.
«Sistema» zertteuşılerı Resei arktikasyndaǧy eŋ ırı jeke jobanyŋ Nūrsūltan Nazarbaevtyŋ ainalasyndaǧy adamdarmen bailanysy bar ekenın mälımdedı. Äŋgıme qūny 1,1 trln rubldı (7,33 trln teŋge) qūraityn Chukotkadaǧy Baimsk tau-ken baiytu kombinaty turaly bolyp otyr. Qūrylys 46 nysandy qamtidy, olardyŋ qatarynda jaǧalaudaǧy qalqymaly atom stansiiasy, jaŋa port jäne 400 şaqyrym jol bar. Jospar boiynşa būl joba Reseidegı mys öndıru kölemın 25 paiyzǧa, al altyn öndırudı 4 paiyzǧa arttyruy tiıs.
«2018 jylǧa deiın joba Roman Abramovich pen onyŋ serıktesterıne tiesılı bolǧan. Keiın ony qazaqstandyq KAZ Minerals satyp aldy. Alaida 2022 jyly bastalǧan soǧys pen AQŞ sanksiialarynan keiın joba jabyq fondqa ötkızılıp, naqty ielerı körsetılmegen»,- delıngen habarlamada.
Zertteuşılerdıŋ mälımetınşe, joba älı de KAZ Minerals kompaniiasynyŋ negızgı aksionerı Vladimir Kimmen bailanysty. Ony bırneşe ret Qazaqstannyŋ tūŋǧyş prezidentınıŋ senımdı adamy ärı «ämiiany» dep ataǧan. Materialdarda Kimnıŋ 2005 jyly Nazarbaevtyŋ sailaualdy ştabynda qyzmet etkenı jäne otbasy qorlaryn qarjylandyrǧany turaly boljamdar keltırıledı. Jurnalisterdıŋ aituynşa, Kimge jaqyn kompaniialar tıptı Nazarbaev üşın ūşaqtar satyp alǧan boluy mümkın. Alaida atalǧan ūiymdar būl derekterdı joqqa şyǧarǧan.
Baimsk jobasy menedjerlerınıŋ ömırbaiandary da Kimmen bailanysty körsetedı. 2024 jyly holdingtı Qazaqstan azamatşasy Elena Raskoşnaia basqardy. Ol būǧan deiın «2Kom», «Sifra Odin» jäne «Setel» kompaniialary basşylarynyŋ orynbasary bolǧan. Būl kompaniialardyŋ barlyǧy «Almatel» tobyna kırgen, al onyŋ iesı retınde Vladimir Kim atalyp kelgen.
Jobany basqaratyn kompaniianyŋ bas direktory qyzmetınde Georgii Fotin qalyp otyr. Ol būǧan deiın Mäskeudegı «Kaz Mineralz» JŞQ-ny basqarǧan. Sondai-aq ol GOK qūrylysyn jüzege asyrǧan «Vega Razvitie» kompaniiasyn da basqarady. Kompaniia Dubaida tırkelgen Nord Rim DMCC-ge tiesılı, al jurnalister ony Kimnıŋ bankımen bailanysty qūrylymdardyŋ qataryna jatqyzady.
Joba Resei bilıgınen bırqatar erekşe jeŋıldık alǧan. Alǧaşqy bes jyl boiy mülık, paida jäne jer salyǧy nölge teŋ bolyp bekıtılgen.
2022 jyldan keiın tūŋǧyş prezident Nūrsūltan Nazarbaev saiasattan ketkendei körıngenımen, ol Resei prezidentımen jiı kezdesıp tūrady. Soŋǧy kezdesu 2025 jyldyŋ mamyrynda Kremlde ötken. Eks-prezidenttıŋ ökılderı būl kezdesudıŋ beiresmi sipatta bolǧanyn jäne «köpjyldyq dostyq qarym-qatynasqa negızdelgenın» mälımdegen.
Būl bailanystar “Sistema” zertteuınşe, reseilık strategiialyq jobalardyŋ artynda Nazarbaevqa jaqyn toptardyŋ boluy mümkın degen küdıktı küşeitedı.
Aita keteiık, «KAZ Minerals» jäne «Qazaqmys» kompaniialary Vladimir Kimnıŋ baqylauynda. Ol «KAZ Minerals»aksiialarynyŋ 63,5 paiyzyna jäne «Qazaqmys» aksiialarynyŋ 70 paiyzyna ielık etedı. Ekı holdingtıŋ de tabysy joǧary deŋgeide qalyp otyr. Tek 2023 jyldyŋ qorytyndysy boiynşa KAZ Minerals Limited qūrylymdarynyŋ bırı 2,15 mlrd dollardan astam paida tapqan. Būǧan qaramastan, kompaniia öndırıstık apattardan zardap şegudı jalǧastyryp keledı: 2024 jyldyŋ tamyz aiynyŋ soŋynda jäne qyrküiektıŋ basynda KAZ Minerals şahtalarynda bes adam qaza tapqan bolatyn.
