اۆستراليانىڭ سيدنەي قالاسىنداعىعى Crown كازينوسىندا الاياقتىق جاسادى دەگەن كۇدىكپەن قازاقستاندىق ەرلى-زايىپتىلار قاماۋعا الىندى. ولار بىرنەشە اي ىشىندە جاسىرىن كامەرا مەن ارنايى قۇلاققاپتاردى پايدالانىپ، ميلليون دوللاردان استام اقشا ۇتقان، دەپ حابارلايدى «ادىرنا» ءتىلشىسى The Guardian-عا سىلتەمە جاساپ.
36 جاستاعى ديلنوزا يسرايلوۆا مەن 44 جاستاعى كۇيەۋى اليشەريحودجا يسرايلوۆ 2025 جىلدىڭ قازان ايىندا قازاقستاننان سيدنەيگە كەلگەن. پوليتسيانىڭ مالىمەتىنشە، ولار كەلگەن كۇنى-اق Crown كازينوسىنىڭ مۇشەلىك كارتاسىن راسىمدەگەن.
قازان مەن قاراشا ايلارىندا ەرلى-زايىپتىلار كازينوعا بىرنەشە رەت بارىپ، جالپى سوماسى 1,18 ميلليون دوللار ۇتقان. ولاردىڭ تۇراقتى جەڭىستەرى كازينو اكىمشىلىگىنىڭ كۇدىگىنە ىلىككەن.
27 قاراشادا كازينو قىزمەتكەرلەرى ايەلدىڭ كيىمىنەن جاسىرىن كامەرانى بايقاپ قالعان. اكىمشىلىك پوليتسيا شاقىرىپ، ايەلدى كۇيەۋىمەن بىرگە كازينو ىشىندە ۇستاپ العان.
تەرگەۋشىلەردىڭ ايتۋىنشا، جۇپتان كىشكەنتاي ماگنيتتىك بەلگىشتەر، قۋاتتاعىشتار جانە ۇستەلدەردى جاسىرىن تۇسىرۋگە مۇمكىندىك بەرەتىن ارنايى بەكىتكىشى بار ءموبيلدى تەلەفون تاركىلەنگەن.
جاڭا وڭتۇستىك ۋەلس شتاتى پوليتسياسىنىڭ نۇسقاسى بويىنشا، ەرلى-زايىپتىلار تەلەفون كامەرالارى ارقىلى ويىن ۇستەلىندەگى كارتالاردى تۇسىرگەن. ال كوزگە كورىنبەيتىن قۇلاققاپ ارقىلى ولار قاي كارتاعا ءباس تىگۋى كەرەكتىگى جونىندە نۇسقاۋلار الىپ وتىرعان.
جالعا العان پاتەردى ءتىنتۋ بارىسىندا باسقا دا ويىن جابدىقتارى، قىمبات اشەكەيلەر جانە 2000 ەۋرو قولما-قول اقشا تابىلعان.
جۇما كۇنى ولاردىڭ ەكەۋى دە بۇلتارتپاۋ شاراسىن قاراۋ ءۇشىن سوتقا جەتكىزىلدى. ولار كەپىلمەن بوساتۋدى سۇراماعاندىقتان، قاماۋدا قالدىرىلدى. ەر ادامنىڭ ءىسى جەلتوقسانعا، ايەلدىڭ ءىسى اقپان ايىنا بەلگىلەنگەن.
