ەكس-پرەزيدەنت نۇرسۇلتان نازارباەۆتىڭ بۇرىنعى كۇيەۋ بالاسىنىڭ اتى جۋىردا جاريالانعان قارجىگەر دجەففري ەپشتەيننىڭ حاتتارىندا اتالدى، دەپ حابارلايدى «ادىرنا» ءتىلشىسى.
ازاتتىق راديوسىنىڭ حابارلاۋىنشا، قۇجاتتاردا راحات اليەۆ اقش-تى پانالاۋعا جانە شامامەن 2 ملرد دوللاردى قايتارۋعا كومەكتەسۋدى سۇراعان.
حاتتار مازمۇنىنا قاراعاندا، اليەۆ 2007–2008 جىلدارى قازاقستانداعى ىقپالىن جوعالتقاننان كەيىن ەۋروپادا جاسىرىنىپ جۇرگەن. ول ءوزىنىڭ اكتيۆتەرى توڭىرەگىندەگى جاعدايدى پايدالانىپ، ەكس-پرەزيدەنت نازارباەۆتىڭ بەدەلىنە نۇقسان كەلتىرۋگە ۇمىتتەنگەن.
سونداي-اق ول ۆاشينگتوندا RJI Government Strategies فيرماسىن جالداعان. بۇل كومپانيا 20-عا جۋىق كونگرەسسمەن كەڭسەلەرىمەن بايلانىس ورناتىپ، اقش زاڭ شىعارۋشىلارىنىڭ قازاقستانعا ساپارىن ىلگەرىلەتكەن. فيرما جاريالاعان ماتەريالداردا اليەۆ «ساياسي قۋعىن-سۇرگىننىڭ قۇربانى» رەتىندە كورسەتىلگەن.
الايدا وباما اكىمشىلىگى بۇل جاعدايعا ارالاسپاۋ تۋرالى شەشىم قابىلداعان. اقش-تىڭ قازاقستانداعى ەلشىسى ريچارد حوۋگلاند قۇپيا جەدەلحاتتارىندا اليەۆ تە، قازاقستان بيلىگى دە اقش-تى ءوز ماقساتتارىنا قولدانۋعا تىرىسۋدا دەپ ەسكەرتكەن.
ەسكە سالايىق، اليەۆ 2007 جىلى ۇيىمداسقان قىلمىستىق توپ قۇرۋ، ادام ۇرلىعىن ۇيىمداستىرۋ، قارۋ قولدانۋ، ادام دەنەسىنە ءارتۇرلى زاقىم كەلتىرۋ سياقتى بىرنەشە ايىپتاۋلار بويىنشا كىنالى دەپ تانىلعان. سول كەزدەگى پرەزيدەنت نۇرسۇلتان نازارباەۆپەن كيكىلجىڭنەن سوڭ ەلدەن قاشىپ كەتكەن ول 2008 جىلدىڭ 15 قاڭتارىندا الماتى قالاسى، المالى اۋدانارالىق سوتىنىڭ شەشىمىمەن سىرتتاي سوتتالعان. سوت اليەۆتى 20 جىلعا باس بوستاندىعىنان ايىرۋ جانە دۇنيە-مۇلكىن تاركىلەۋ تۋرالى شەشىم شىعارادى. وسى جىلى اقمولا اسكەري گارنيزونىندا تاعى دا سىرتتاي سوت پروتسەسى ءوتىپ، اليەۆتىڭ 20 جىلىنا تاعى 20 جىل قوسىپ بەرىلەدى. 2008 جىلدىڭ 20 ساۋىرىندە نازارباەۆتىڭ شەشىمىمەن اليەۆتىڭ بارلىق ناگراداسىنىڭ كۇشى جويىلدى. سول جىلى اۆستريا سوتى اليەۆتى قاماۋعا الىپ، كەيىن 1 ميلليون ەۆرو كەپىلدىكپەن ءۇي قاماققا جىبەرەدى.
2014 جىلدىڭ جەلتوقسانىندا اۋستريا راحات اليەۆكە ەكى بانكيردى ولتىرگەنى ءۇشىن ايىپ تاققان. ول ءوز كىناسىن مويىندامادى. ال 2015 جىلى اليەۆ اۆستريا تۇرمەسىندەگى جالعىز كىسىلىك كامەرادان ءولى تابىلعان. اۆستريا بيلىگى ونىڭ سۋيتسيدتەن قايتىس بولعانىن مالىمدەگەن.
